سەردێر

دوای سەردانەكەی پاپا چەند وڵاتێك ئامادەن موسڵ بنیادبنێنەوە

خەڵك

لەدوای سەردانەكەی پاپای ڤاتیكان بۆ پارێزگای نەینەوا، چەند وڵاتێك پێشنیاری هاوكاریكردنی عیراقییان بە مەبەستی دووبارە بنیادنانەوەی موسڵ كردووە.


نەجم جبوری پارێزگاری نەینەوا لە لێدوانێكی ڕۆژنامەوانیدا ڕایگەیاند: سەردانەكەی پاپای ڤاتیكان بۆ موسڵ، هەلێكی مێژوییە، چونكە ئەو سەردانە بووەتە هۆكاری ئەوەی زۆربەی دەزگا ڕاگەیاندنەكانی جیهان باس لە نەهامەتییەكانی موسڵ بكەن و تیشك بخەنەسەر ئەو وێرانكارییەی لە شارەكەدا ڕوویداوە.

پارێزگاری نەینەوا وتیشی: باڵیۆزی ژمارەیەك وڵات ئامادەییان دەربڕیوە بۆ ئەوەی سەردانی موسڵ بكەن، ئامادەیی وڵاتەكانیشیان بۆ دووبارە بنیادنانەوەی شارەكە نیشانداوە.

نەجم جبوریی ئاماژەی بەوەشكرد: پاپای ڤاتیكان بەڵێنیداوە یارمەتی موسڵ بدات بەمەبەستی بنیادنانەوەی شارەكە، جگە لەوەش سەردانەكەی بووە هۆی دروستكردنی هاوسۆزی لە ناوخۆ و دەرەوەی عیراق.