سەردێر

پەروەردە بڕیاری لەسەر پشووی خوێندكاران و مامۆستایان دا

خەڵك-
دوای ئەوەی حكومەتی هەرێمی كوردستان دوو ڕۆژی (11 و 14ی ئادار)ی كردە پشووی فەرمی، وەزارەتی پەروەردە جەختی كردەوە، كە ئەو پشووە ناوەندەكانی خوێندن ناگرێتەوە.

جوتیار عادل، وتەبێژی فەرمی حكومەتی هەرێم ئەمڕۆ سێ‌ شەممە ڕایگەیاند، ڕۆژی 11ی ئادار بەبۆنەی (ساڵیادی ڕێككەوتننامەی 11ی ئاداری 1970) و ڕۆژی 14ی ئادار بەبۆنەی (ڕۆژی لەدایكبوونی بارزانی نەمر) دەبنە پشوی فەرمی لەسەرجەم دام و دەزگاكانی حكومەتی هەرێم.

لای خۆشیەوە، وەزارەتی پەروەردەی حكومەتی هەرێم لە فەرمانێكی وزاریدا ئاماژەی بەوەكردووە، بۆ مانگی ئادار، تەنها سێ ڕۆژی جەژنی نەورۆز، پشووی فەرمییە و هاتووە، “ناوەندەکانی خوێندن تەنها پابەند دەبن بە سێ رۆژ پشووی جەژنی نەورۆز و سێ رۆژ جەژنی رەمەزانی پیرۆز، جگە لە ڕۆژانی هەینی كە دەوام نییە سوود لە هەموو پشوەكانی دیكە وەردەگیرێت”.

بەپێی خشتەی پشووەكانی حكومەتی هەرێم، لە مانگی ئاداردا ڕۆژەكانی (5 و 11 و 14 و 20 و 21 و 22) دەبنە پشووی فەرمی.