سەردێر

كێشەی پاككەرەوەكانی سلێمانی چارەسەركرا

سلێمانی – نزار جەزا

شارەوانی سلێمانی ڕایگەیاند، كێشەی كۆمپانیاكانی پاككەرەوە چارەسەركرا.

سەردەشت ڕەفیق وتەبێژی شارەوانی سلێمانی لەكۆنفڕانسێكی ڕۆژنامەوانیدا ڕایگەیاند، كێشەی كۆمپانیاكانی پاككەرەوە چارەسەركرا و دەست بەكاركردن دەكەنەوە.

ئاماژەی بەئەوەشدا، هەر ئەمڕۆ لەڕێگەی وەزارەتی شارەوانی و گەشتوگوزار و پارێزگاوە كێشەكە چارەسەركراوە.

ئەمە لەكاتێكدایە، ئەمڕۆ سێ شەممە كرێكارانی كۆمپانیاكانی پاكردنەوەی ناوشاری سلێمانی بەهۆی وەرنەگرتنی موچەكانیان بایكۆتی كاركردنیان ڕاگەیاند.

ئەركی پاككردنەوەی ناو شاری سلێمانی دراوە بە سێ كۆمپانیا، كە هەریەكێكیان دەوروبەری 250 كرێكاریان هەیە.

دانا عیسا، نوێنەری كۆمپانیای شكار، كە یەكێكە لەو كۆمپانیایانە بە (خەڵك)ی ڕاگەیاند، لەسەری ساڵەوە بەتەندەری نوێ كاردەكەن، لەو كاتەشەوە حكومەتی هەرێم هیچ بڕە پارەیەكی بۆ خەرجنەكردوون.

زیاتر ڕوونیكردەوە، ئەم سێ مانگە لەسەر ئەركی كۆمپانیاكان خۆیان كاری پاككردنەوەیان كردووە و كرێی دوو مانگ كاركردنی كرێكارەكانیان داوە، بەڵام چیتر توانایان نییە و پێویستە حكومەتی هەرێم ئەو بودجەیەی پێویستە بۆیان دابینبكات.

ئاماژەی بەئەوەشدا، لەدوێنێ ئێوارەوە كە كارەكانیان تەواوكرد، بڕیاریاندا چیتر كارنەكەن، چونكە كرێكاریش بەبێ موچە كارناكات.

وتیشی:داواكارییەكانیان بەرزكردۆتەوە بۆ شارەوانی سلێمانی، ئەوانیش لەسەرهێڵن لەگەڵ وەزارەتی شارەوانی و گەشتوگوزار و لایەنە بەرپرسەكان، بۆئەوەی چارەسەری ئەم كێشەیە بكەن”.

دەشڵێت”ئێمە 285 كرێكارمان هەیە، كۆمپانیاكانی دیكەش بەهەمانشێوە ڕێژەیەك كرێكاریان هەیە و هەریەكەیان پێویستیان بەموچەیە”.

ڕۆژانە و بەردەوام لەلایەن كۆمپانیاكانی پاككردنەوەوە خۆڵ و پیسی لەشاری سلێمانی كۆدەكرێتەوە و لەتانجەرۆ ڕۆدەكرێت، لەئەگەری وەستانی كاری ئەم كۆمپانیایانە خۆڵ و پیسییەكی زۆر لەناو شار كۆدەبێتەوە و كاریگەری خراپی بۆ تەندروستی و پیسبوونی ژینگە دەبێت.