سەردێر

لێزمە باران و بەفر بارین دەستپێدەكاتەوە

خەڵك-

بەڕێوەبەرایەتی گشتی كەشناسی و بومەلەرزەزانی هەرێمی كوردستان ڕایدەگەیەنێت، شەپۆلێكی باران بارین ڕوو لە ناوچەكەمان دەكات و سەرەتای هاتنی شەپۆلی باران بارینەكە لە ئێوارەی شەوی چوار شەممە لەسەر پێنج شەممە دەستپێدەكات.

بەڕێوەبەرایەتی گشتی كەشناسی و بومەلەرزەزانی هەرێمی كوردستان لە ڕاگەیەنراوێكدا ئاماژە بۆ ئەوە دەكات، شەپۆلەكە بە دوو قۆناغ دەستپێدەكات، یەكەمیان لە درەنگانی شەوی چوار شەممە دەستپێدەكات، زیاتر باران بارینەكە لەسەر ناوچە شاخاوییەكان دەبێت و سەنتەری پارێزگاكان ئەگەری نمە بارانی دەبێت، ڕۆژی پێنج شەممە لە كاتەكانی ڕۆژدا ئاسمان زیاتر نیمچە هەور دەبێت لەگەڵ بەرزبوونەوەی پلەكانی گەرما بە نزیكەی 4-6 پلەی سیلیزی و زیادبوونی خێرای با كە لە هەندێ ناوچە بۆ سەرووی 40 كم لە كاتژمێرێكدا زیاد دەكات.

ئاشكراشیكرد، لە شەودا قۆناغی دووەمی باران بارینەكە دەستپێدەكات، باران بارین لە سەرجەم ناوچەكان دەبارێت، ڕۆژی هەینی شەپۆلی باران بارینەكە چالاكتر دەبێت و ئاستی باران بارین لە هەندێ ناوچە لێزمە بارانی دەبێت، ڕۆژی هەینی لەگەڵ باران بارین بارستە هەوایەكی سارد ڕوو لە ناوچەكەمان دەكات و پلەكانی گەرما بە نزیكەی 6-8 پلە نزم دەكاتەوە، بۆیە لەكاتی باران بارین ئەگەری تەزرە بارین دەبێت لە هەندێ ناوچە لەگەڵ بەفر بارین لەسەر لووتكەی شاخە بەرزەكان و ناوچە سنووریەكان، كاریگەری ئەم شەپۆلە تا ئێوارەی ڕۆژی هەینی بەردەوامی دەبێت.