سەردێر

پاككەرەوەكانی سلێمانی بایكۆتیان ڕاگەیاند

سلێمانی ـ نزار جەزا

كرێكارانی كۆمپانیاكانی پاكردنەوەی ناوشاری سلێمانی بەهۆی وەرنەگرتنی مووچەكانیان بایكۆتی كاركردنیان ڕاگەیاند.

ئەركی پاككردنەوەی ناو شاری سلێمانی دراوە بە سێ كۆمپانیا، كە هەریەكێكیان دەورووبەری 250 كرێكاریان هەیە.

دانا عیسا، نوێنەری كۆمپانیای شكار كە یەكێكە لەو كۆمپانیایانە بە (خەڵك)ی ڕاگەیاند، لە سەرەتای ساڵەوە بەتەندەری نوێ كاردەكەن، لەو كاتەشەوە حكومەتی هەرێم هیچ بڕە پارەیەكی بۆ خەرج نەكردوون.

ڕوونیكردەوە، ئەم سێ مانگە لەسەر ئەركی كۆمپانیاكان خۆیان كاری پاككردنەوەیان كردووە و كرێی دوو مانگ كاركردنی كرێكارەكانیان داوە، بەڵام چیتر توانایان نییە و پێویستە حكومەتی هەرێم ئەو بودجەیەی پێویستە بۆیان دابینبكات.

ئاماژەی بەئەوەشدا، لەدوێنێ ئێوارەوە كە كارەكانیان تەواوكرد، بڕیاریاندا چیتر كارنەكەن، چونكە كرێكاریش بەبێ مووچە كارناكات.

وتیشی”داواكارییەكانیان بەرزكردووەتەوە بۆ شارەوانی سلێمانی، ئەوانیش لەسەرهێڵن لەگەڵ وەزارەتی شارەوانی و گەشتوگوزار و لایەنە بەرپرسەكان، بۆئەوەی چارەسەری كێشەكە بكەن”.

دەشڵێت”ئێمە 285 كرێكارمان هەیە، كۆمپانیاكانی دیكەش بەهەمانشێوە ڕێژەیەك كرێكاریان هەیە و هەریەكەیان پێویستیان بە مووچەیە”.

ڕۆژانە و بەردەوام لەلایەن كۆمپانیاكانی پاككردنەوەوە خۆڵ و پیسی لەشاری سلێمانی كۆدەكرێتەوە و لەتانجەرۆ ڕۆ دەكرێت، لەئەگەری وەستانی كاری ئەم كۆمپانیایانە خۆڵ و پیسییەكی زۆر لەناو شار كۆدەبێتەوە و كاریگەری خراپی بۆ تەندروستی و پیسبوونی ژینگە دەبێت.