سەردێر

بۆڕۆژی لەدایك بوونی 125 نەمام دەچێنێت

خەڵك
گەنجێكی دەربەندیخان لە ڕۆژی لەدایك بونەكەیدا 125 نەمام لە 5 قوتابخانە دەچێنێت.

بیلال حەسەن، گەنجێكی تەمەن 25 ساڵی دانیشتووی قەزای دەربەندیخانە و دەرچووی قۆناغی ئامادەیی بەشی پیشەیی كارەبایە و وەك خۆی دەڵێت، ماوەی 6 ساڵە پارێزەری ژینگەیە بە خۆبەخش.

بیلال لە ڕۆژی لەدایك بوونی كە بووەتە 25 ساڵ ، 125 نەمامی لە جۆری زەیتون و سنەوبەر چاندووە.

نەمامەكانی لە 5 قوتابخانەی دەربەندیخان چاندووە و لە هەر قوتابخانەیەك 25 نەمام وەك ئاماژەیەك بۆ ساڵەكانی تەمەنی.

ئەو دەڵێت، وەك وەفاو و خۆشەویستیەك بۆ ئەو قوتابخانانەیەی كە پێشتر تێیدا خوێندبووم ، بەڵێنمدا لەڕۆژی لەدایكبوونمدا نەمامی تێدا بچێنم.

بیلال دەڵێت “ئامانجی من ئەوەیە هاووڵاتیان لە ڕۆژی لەدایكبوونیاندا یادەكانیان بە نەمام و گوڵ چاندن بەرز ڕابگرن و ئەم كارە وەك كلتوری لێبێ”.

ئاماژە بەوە دەكات، من پارێزەری ژینگەم ئەندامی ڕێكخراوی سروشتی كوردستانم ئێمە لە ساڵانی پێشتردا بەچەندین كاروچالاكی مەیدانی پەیام و چالاكی ژینگەییەكانمان گەیاندووە بە هاووڵاتی و حكومەت لە هەموو شارو شارۆچكەكان و ئێمە بەردەوامین، من وەكو خۆشم هەمیشە لەپێناو ژینگە كارم كردووە و بەردەوامم.

“چالاكییەكانی دەباتە شارو شارۆچكەكانی دیكەی هەرێم”

ئەو گەنجە دەڵێت، ئەم چالاكییە تایبەت بوو بەو قوتابخانانەیەی كە پێشتر تێیدا خوێندبووم ، بەڵام بۆ داهاتوو بە چەندین بیرۆكەی نوێوە بەردەوام دەبم لەخزمەتكردنی ژینگە.

ئاماژە بەوە دەكات كە چەند كەسێك هاوكاری بوون و دەڵێت، خانەوادەكەم هاوكارییەكی باشمبوون تا من ببم بە ژینگەپارێزێكی خۆبەخش و خزمەت بە شارەكەم و كوردستان بكەم و
مامۆستایان و قوتابیان هاوكاریەكی باشم بوون لە چاندنی نەمامەكاندا.

“داوایەك لە هاوڵاتیان دەكات”

سەبارەت بە پاك ڕاگرتنی ژینگە بیلال دەڵێت، داوا لەهاوڵاتیان دەكەم ژینگەی چواردەوریان پاك ڕابگرن، چونكە هەموومان لەسەر ئەم زەویە ئەژین ئەركی سەرشانمانە ژینگەكەمان پاك ڕابگرین، درەختەكان ئۆكسجینی پاكمان بۆ بەرهەم دەهێنن و دیمەنێكی سەوزی جوان بە ژینگەی كوردستان دەدات، بۆیە داوا لە هاوڵاتیان دەكەم درەختەكان نەبڕنەوە و خزمەتی بكەن.
“كاتێك سەردانی ناوچە گەشتیاریەكان دەكەن تكایە پاكو خاوێنی ئەو ناوچانە ڕابگرن، چونكە دوای ئێوە چەندین كەس دێتە ئەو جێگایە ، بۆیە دەبێ ناوچە گەشتیارییەكان و ژینگەی چوار دەورمان پاك رابگرین ، بەهیوای پاراستنی ژینگە و سەوزكردنی ژینگەی كوردستان”.

No description available.

No description available.

No description available.

No description available.

No description available.

No description available.

No description available.