سەردێر

یاسای ڕۆژنامەگەری لەهەرێم پەراوێزخراوە

لقی سلێمانی سەندیكای ڕۆژنامەنوسان هۆشداری دەدات

سلێمانی ـ نزار جەزا

یاسای ڕۆژنامەگەری كوردی لەهەرێمی كوردستان پەراوێزخراوە و هەندێك یاسای دیكە بۆ سزادانی ڕۆژنامەنوسان بەكاردەهێنرێت، لەبەرامبەر ئەمەشدا لقی سلێمانی سەندیكای ڕۆژنامەنوسان هۆشداری دەدات.

ئەمڕۆ شەممە پانێڵێكی تایبەت بەسزادانی ڕۆژنامەنوسان و پاساوەكانی پەراوێزخستنی یاسای ڕۆژنامەگەری بەڕێوەچوو.

لەپانێڵەكەدا كاروان ئەنوەر سكرتێری لقی سلێمانی سەندیكای ڕۆژنامەنوسانی كوردستان باسی لەئەوەكرد، ئەگەر دۆخی ڕۆژنامەنوسان هەر بەم جۆرەی ئێستابێت، كە بەیاسای دیكە مامەڵە لەگەڵ ڕۆژنامەنوسان بكرێت، بێگومان هەڵوێستیان دەبێت، چونكە ناكرێت ڕۆژنامەنوس بەبەرچاویانەوە سزابدرێت و سەندیكای ڕۆژنامەنوسانیش هەڵوێستی نەبێت.

یاسا بەركارەكانی هەرێم بۆ كاری میدیا زۆرن، بەڵام لە هەندێك كاتدا دەستیان بۆ نابرێت و بەپێی ویست هەندێك یاسای دیكە سزای ڕۆژنامەنوسی پێدەدرێت.

شوان ئادەم ئەیڤەس، سەرۆكی ڕێكخراوی چاودێریی میدیای كوردی ڕایگەیاند، لەهەرێمی كوردستان نۆ یاسای تایبەت بەگۆشە جیاوازەكانی میدیا و ڕاگەیاندن دەرچوون، بەڵام فەراغێكی گەورە هەیە، بۆ ڕێكخستنی میدیای ئەلیكترۆنی، هەروەها هەندێك لەیاساكان بەیەكداچونیان تێدایە و پێویستە ڕێكبخرێن.

ئاماژەی بەئەوەشدا، لەجێگەی ئەوەی میدیا چاودێر بێت بەسەر سێ دەسەڵاتەكەی دیكەوە، بەڵام ئێستا ئەمە پێچەوانەبۆتەوە، ئەو سێ دەسەڵاتە چاودێرن بەسەر میدیاوە و لەقاڵبی دەدەن.

ئازادی ڕادەربڕین ئەو چەترەیە، كە زۆرترین مافەكانی دیكەی لەژێردا كۆدەبێتەوە، بۆیە گرنگە ئەم مافە بۆ ڕۆژنامەنوسان و هاوڵاتیان فەراهەمبكرێت.

حاكم ڕزگار محەمەد ئەمین، ئەندامی دادگای تێهەڵچوونەوە ڕایگەیاند، ئەو یاسایانەی لەهەرێم هەن زۆر بچوكترن لەوەی چارەسەری كێشەی مافی ئازادی ڕادەربڕین بكەن، چونكە مافی ئازادی ڕادەربڕین هێزی دەستوور و جاڕنامە جیهانییەكانی لەپشتەوەیە.

ئەوەشی خستەڕوو، ئیشی دادگا تەنها جێبەجێكردنی یاسا نییە، بەڵكو دەبێت بگاتە دادپەروەری، بۆیە هیوادارن ئازادی ڕادەربڕین ببێتە عەقیدە لەفكری هەموو دادوەرێكدا، نەك تەنها یاسا جێبەجێبكات.

ئەمە لەكاتێكدایە ‌پێویستە خەمخۆرانی مافی ئازادی ڕادەربڕین لەهەنگاوە مەدەنییەكان بەردەوامبن، بۆئەوەی دادوەری تایبەت یان دادگایەكی تایبەت بە مامەڵەكردن لەگەڵ كەیسی ڕۆژنامەنوسان تەرخانبكرێت.