سەردێر

هەولێر، باندێك بە تۆمەتی ڕفاندنی كچێك دەستگیركران

خەڵك-

نوسینگەی بەرەنگاربوونەوەی توندوتیژی دژی ئافرەتان و خێزان لە هەولێر دەستگیركردنی چوار گەنج لەسەر رفاندنی كچێك ڕادەگەیەنێت.

بەپێی راگەیەنراوێك كە لەلایەن نوسینگەی بەرەنگاربوونەوەی توندوتیژی دژی ئافرەتان و خێزان لە هەولێر بڵاوكرایەوە “هاووڵاتیەك بەناوی (ش، أ) سەردانی نوسینگەی منارەی بەرەنگاربوونەوەی توندوتیژی كردووە و سكاڵای تۆماركردووە بە هۆی وون بوونی كچەكەی كە نەوجەوان بوو بە ناوی ( ن، ش،أ)، بۆیە دادوەری لێكۆڵینەوە بڕیاریدا بەدواداچوون بكرێت بۆ دۆزینەوەی ئافرەتە نەوجەوانەكە بە پێی ماددەی (7)ی خێزانی”.

هەر لە ڕاگەیەندراوەكەدا هاتووە”دوای ماوەیەك لە بەدواداچوون و كۆكردنەوەی زانیاری لەسەر شوێنی داڵدەدانی ئافرەتە نەوجەوانەكە گەیشتونەتە یٔەنجام و لە ڕێكەوتی (2021/3/1 كاتژمێر (1)ی شەو مەفرەزەیەك توانیویانە باندێك دەستگیر بكەن كە لە چوار كەس پێك هاتبوون و ئافرەتە نەوجەوانەكەیان داڵدەدابوو لە ماڵێك”.

نوسینگەی بەرەنگاربوونەوەی توندوتیژی دژی ئافرەتان و خێزان لە هەولێر دەڵێت”لەكاتی دەستگیركردنی ئەو باندە چوار كەسیە دەست بەسەر بڕێك مادەی هۆشبەرداگیرا لە جۆری (كریستاڵ) لە ئێستاشدا ڕێكارە یاساییەكان جێ بە جێ دەكرێت بەرامبەر ئەو باندە و لێكۆڵینەوەش لە كەیسەكەدا بەردەوامە”.