سەردێر

“بەغدا نایەوێت خواستەكانی هەرێم ڕەتبكاتەوە”

خەڵك-

چاودێرێكی سیاسی ڕایدەگەیەنێت، بەغدا نایەوێت بە ئاسانی هەموو خواستەكانی هەرێم ڕەتبكاتەوە.

دوای دەیان كۆبوونەوەی نێوان هەرێم و بەغدا، تا ئێستا نەگەیشتوونەتە ڕێككەوتن بۆ كۆتاییهێنان بە كێشەكانی نێوانیان بەتایبەت بودجەی ئەمساڵ، بەپێی زانیارییەكانیش ئەم هەفتەیە بڕیاری یەكلاكەرەوە دەدرێت.

هێمن میرانی، مامۆستای زانكۆ و چاودێری سیاسی بە (خەڵك)ی ڕاگەیاند، هەرێمی كوردستان لە ساڵی 1991 تاكو 2003 توانیومانە خۆمان بەڕێوەبەرین، بەغدا دەبێت ئەوەی لەبەرچاو بێت، ئەگەر هەوڵی گەمارۆخستنەسەر هەرێم بدات، هەرێم پێشتر ئەو ئەزموونەی هەبووە.

وتیشی، “ئێمە دووجار گەمارۆمان لەسەر بوو، جارێكیان گەمارۆیەكی عێراقی، جارێكیش نێودەوڵەتی، ئینجا توانیمان بژین”.

ئاشكراشیكرد، ئەو سیاسەتانەی بەغدا ئەگەر بەردەوام بێت، هەرێم ناچار دەبێت چاكسازی بكات و پێداچوونەوە بە خەرجییەكانی بكات، بۆیە هەرێم ناكەوێت ئەگەر لەگەڵ بەغدا ڕێكبكەوێت یان نا، بەڵكو ناچار دەبێت چاكسازی بكات تاكو ئیدارەی خۆی بكات.

ڕوونیشیكردەوە، بارودۆخەكە جیاوازە و ساڵی 1991 نییە و دەرگای دونیامان بەسەردا داخرابێت، ئێمە نەوتی خۆمان دەفرۆشین و سنوورمان هەیە و بازرگانیمان لەگەڵ ئەو وڵاتانەی دراوسێ هەیە و سەرچاوەی نانەوتیمان هەیە، تەنها پێویستی بە ئیدارەدانێكی باشتر هەیە و دەستیش بەوە كراوە كە خەرجییەكان كەم بكرێنەوە، بۆیە هەرێم بەبێ بەغدا دەتوانێت كارەكانی خۆی بەڕێوەببات، بۆیە ئەو تێگەیشتنە لە بەغدا هەیە و نایانەوێت بە ئاسانی هەموو شتێكی هەرێم ڕەتبكەنەوە، چونكە وا تێدەگەن بە ڕەتكردنەوەی هەرێم قازانج بكات لە دوور مەودادا.