سەردێر

خەڵك؛ شێوازی یادكردنەوەی كیمیابارانی هەڵەبجە ئاشكرادەكات

خەڵك – یەحیا حبیب

دوای ئەوەی لیژنەی باڵای ڕوبەڕوبونەوەی ڤایرۆسی كۆرۆنا لە پارێزگای هەڵەبجە ڕاگرتنی كار و چالاكییەكانی ڕاگەیاند، بەڕێوبەری گشتی شەهیدان و ئەنفالكراوانی هەڵەبجە دەڵێت، “یادی كارەساتی كیمیاباران دەكرێتە جیاواز لە ساڵانی ڕابردوو، بەڵام لە چوارچێوەی ڕێنماییە تەندروستییەكان و دوور لە بانگیشتكردنی فەرمی”.

م. كامەران موستەفا، بەڕێوبەری گشتی شەهیدان و ئەنفالكراوانی پارێزگای هەڵەبجە لە لێدوانێكیدا بە (خەڵك)ی ڕاگەیاند، “كارەساتی 16/3 كیمیابارانكردنی هەڵەبجە، لە هەرێمی كوردستان و جیهانیشدا ڕووداوێكی خەمهێنەرە و جیهان دانی پێدا ناوە و ئەمساڵیش 33 ساڵ بەسەر ئەو كارەساتە گەورەیەدا تێپەڕ دەبێت و ئەمساڵیش ئەو یادە بەرز ڕادەگیرێت”.

وتیشی، “بەداخەوە ساڵی ڕابردوو بەهۆی ڤایرۆسی كۆرۆنا و كەرەنتینەكردن چوینە ژێرباری ڕێنماییەكانی وەزارەتی ناوخۆ و تەندروستی و وەزارەتی داراییش، بەڵام لەگەڵ ئەوەشدا ئێمە لە كاتی كەرەنتینەكەدا هەموو شارمان بە (فلێكس و لۆگۆ و پۆستەر) ڕازاندۆتەوە بەجۆرێك سیمای شار ئەوەی پێوەدیار بووە، كە مەرگەساتێك هەیە “.

ڕاشیگەیاند، “لە سەرەتای ئەمساڵەوە و بە سەرپەرشتی پارێزگاری هەڵەبجە و ئەو لایەن و ڕێكخراوانەی، كە تایبەتمەندبوون بە یادی كیمیابارانی هەڵەبجە چەند كۆبوونەوەمانك ردووە و بڕیاریشمان داوە، كە چالاكییەكان لە چوارچێوەی هۆڵێكدا كۆنەكەینەوە بەشێوەی دووبارە و دەمانەوێت شێوەی یادكردنەوەكان بگۆڕدرێت”.

م. كامەران موستەفا، جەختیكردەوە، “یادی كیمیابارانی هەڵەبجە دەكرێتەوە، بەڵام لەچوارێچێوەی ڕێنماییە تەندروستییەكان، هیچ میوانێك بانگ ناكرێت بە فەڕمی بۆ ئامادەبوونی و بڕیارە لە مەزاری شەهیدان چالاكی بەڕێوەبچێت وەك ڕێزێك هیچ كورسیەك دانانرێت و ماوەی چالاكییەكان هەموو بە پێوە ڕادەوەستن وەك ڕێزێك”.

بەڕێوبەری گشتی شەهیدان و ئەنفالكراوانی هەڵەبجە دەشڵێت، “ڕۆژی یەك شەممە بڕیار دەدرێت، كە پلانەكان بە دیاری كراوی چۆن جێبەجێ بكرێت داواشمان كردووە سەرجەم دامودەزگاكان لە تەندروستی و زانكۆی هەڵەبجە و ڕێكخراوەكانی كۆمەڵگەی مەدەنی كاری چالاكی خۆیان هەبێت”.