سەردێر

بەهای ئاڵتون بەرزبووەوە و دۆلار دابەزی

خەڵك-

بەهۆی زۆری خواست و بڵاوبوونەوەی زنجیرەی نوێی ڤایرۆسی كۆرۆنا و پلانێكی سەرۆكی ئەمریكا بۆ بووژاندنەوەی وەبەرهێنان، نرخی زێڕ لە بۆڕسەی جیهانی و بازاڕەكان ڕووی لە بەرزبوونەوە كردووە.

دانا وەرتی، خاوەنی زێڕنگەری ئازوورا لە هەولێر بۆ (خەڵك) ئاماژەی بەوەكرد، ئەمڕۆ نرخی زێڕ لە بۆڕسەی جیهانی بەرزبۆتەوە و بەهی یەك ئۆنس گەیشتۆتە 1810 دۆلار و نرخی یەك لیرەی دوبەی عەیارە 22 بە 390 دۆلارە.

ئاماژەی بەوەشكرد، نرخی یەك مسقاڵ ئاڵتونی عەیارە 21 بۆ 372 هەزار و ئاڵتونی عەیارە 18 بۆ 318 هەزار دینار بەرزبۆتەوە.

سەبارەت بە هۆكارەكانی بەرزبوونەوەی بەهای زێڕ وتی، “دوو هۆكار بۆتە هۆی بەرزبوونەوەی نرخی زێڕ، كە بریتیە لە زیادبوونی خواستی كڕین و نزیک بوونەوە لە پەسەندکردنی هاندانی دارایی، کە لەلایەن جۆ بایدن پێشنیار کراوە بە گوژمەی 1.9 ترلیۆن دۆلار، كە کە پێشبینی دەکرێت لە هەفتەی داهاتوو پەسەند بکرێت”.

لای خۆشیەوە، یادگار حەسەن لە كۆمپانیای سەعید بە (خەڵك)ی ڕاگەیاند، نرخی دۆلار بۆ ئەمڕۆ چوار شەممە 24-2-2021، بەپێی بازاڕی گۆڕینەوەی دراوی بیانی لە شاری سلێمانی 100 دۆلاری ئەمریكایی بە 145 هەزار 600 دینار مامەڵەی پێوە كراوە.