سەردێر

بەرزترین ژمارەی تووشبوونی منداڵان بە كۆرۆنای نوێ‌ ڕاگەیەنرا

خەڵك-
وەزارەتی تەندروستی عیراق وردەكارییەكانی تایبەت بە بڵاوبوونەوەی كۆرۆنای نوێ‌ (گۆڕاو) و تووشبوونی منداڵان و گەیشتنی ڤاكسینی كۆرۆنا ئاشكرادەكات و دەشڵێت: “باشترین چارەسەر بەستنی دەمامك و دووركەوتنەوەیە لە قەرەباڵغی”.

حەسەن تەمیمی، وەزیری تەندروستی عیراق لە چاوپێكەوتنێكی تەلەفزیۆنیدا ئاماژەی بەوەكرد، بڵاوبوونەوەی ڤایرۆسی كۆرۆنای نوێ‌ و زنجیرە گۆڕاوەكانی پێشبینی كراو بوون و بەوەش جیادەكرێتەوە، كە بەخێرایی بڵاودەبێتەوە و منداڵانیش تووش دەبن.

ئاشكراشی كرد، كە جیا لە ڤایرۆسی كۆرۆنا سەرەكییەكە ئەم زنجیرە گۆڕاوەی بەوە جیادەكرێتەوە منداڵان زۆر تووش دەبن و ماكەكانی زیاتر دەردەكەون و چەندین حاڵەتی قورسیش تۆماركراوە.

وتیشی، “ئەوەی باسكراوە 500 منداڵ تووش بووبن ڕاست نییە، بەڵكو تا ئێستتا 300 منداڵ لە تەواوی عیراق تووشی زنجیرەی نوێی كۆرۆنا بوون، بەڵام هیچ حاڵەتێكی مردن لەناو منداڵان تۆمارنەكراوە”.

وەزیری تەندروستی هۆشداری دا بە هاووڵاتیان، “پێویستە دەمامك ببەستن و دووربكەونەوە لە قەرەباڵغی و پابەندی ڕێكاری خۆپارێزی ببن”.

جەختیشی كردەوە، لە هەفتەی داهاتوودا یەكەم بەشی ڤاكسینی كۆرۆنا دەگاتە وڵات، كە 1.5 ژەمی ڤاكسینە لە جۆری ڤایزەر و هەروەها بڕی 3.4 ملیۆن ڤاكسینی جۆری ئەسترازینیكا دەگات لە چەند ڕۆژی داهاتوودا و وتیشی، “عیراق بڕی 16 ملیۆن ڤاكسینی كڕیوە و بەش بەش دەگەنە وڵات و پێشبینی دەكەین تەنها لە مانگی ئازاردا 8 ملیۆن هاوووڵاتی بكوترێن”.