سەردێر

ئەنجومەنی وەزیران، پرسی بودجە‌ و شایستە‌ داراییە‌كانی تاوتوێ كرد

خەڵك-

كۆبوونەوەی ئەنجومەنی وەزیرانی هەرێمی كوردستان كۆتایی هات.

ئەمڕۆ چوار شەممە ئەنجومەنی وەزیرانی هەرێمی كوردستان كۆبووەوە چەند پرسێكی پەسەند كرد.

دەقی ڕاگەیەنراوەكەی حكومەتی هەرێم:

ئەنجومەنی وەزیران گفتوگۆ دەربارەی دوا پەرەسەندنەكانی پڕۆژە یاسای بودجەی فیدراڵی و بودجەی هەرێمی كوردستان دەكات .

• پەیڕەوی هاوبەشیكردنی نێوان كەرتی گشتی و كەرتی تایبەت لە هەرێمی كوردستان و ڕەشنووسی پڕۆژە یاسای وەزارەتی كارەبا پەسەند كران.

ئەمڕۆ چوارشەممە 2021/2/24 ئەنجومەنی وەزیرانی هەرێمی كوردستان بە سەرۆكایەتی مەسرور بارزانی سەرۆكی ئەنجومەنی وەزیران و ئامادەبوونی قوباد تاڵەبانی جێگری سەرۆكی ئەنجومەن كۆبووەوە .

لە سە‌رە‌تای كۆبوونە‌وە‌كە‌دا، جێگری سەرۆك وەزیران و سە‌رۆكی شاندی دانوستاندكار، دوا پێشھات و رێڕە‌وی گفتوگۆكان لە‌گە‌ڵ حكومەتی فیدراڵی سە‌بارە‌ت بە‌ پرسی بودجە‌ و شایستە‌ داراییە‌كانی ھە‌رێمی كوردستان لە‌ پڕۆژە‌ یاسای بودجە‌ی 2021، خستە‌ڕوو. جە‌ختی لە‌وە‌ش كردە‌وە‌ كە‌ بە‌ردە‌وامن لە‌ دانوستاندنە‌كان و ئێستا ئامادەییەكی باشتر ھە‌یە‌ بۆ چارە‌سە‌ر كردنی ئەم بابەتە.

ئینجا ئاوات شێخ جەناب وەزیری دارایی و ئابووری و دارا ڕەشید وەزیری پلاندانان تیشكیان خستە سەر دوایین ئامادەكارییەكانی پڕۆژە یاسای بودجەی هەرێمی كوردستان بۆ ساڵی 2021 و ئاماژەیان بەوە كرد كە زۆربەی داتاكانی وەزارەتەكان ئامادە كراوە بۆ ئەوەی بودجەیەكی شەفاف و واقیعی ئامادە بكرێت.

 

لە بڕگەیەكی دیكەی كۆبوونەوەكەدا ، وەزیری پلاندانان، ڕەشنووسی پڕۆژە پەیڕەوی هاوبەشیكردنی نێوان كەرتی گشتی و كەرتی تایبەت لە هەرێمی كوردستان خستەڕوو . دوای گفتوكۆ و ڕاگۆڕینەوە، پەیڕەوەكە پەسەند كرا.

بڕگەی دیكەی كۆبوونەوەكە، بریتی بوو لە پەسەندكردنی ڕەشنووسی پڕۆژە یاسای وەزارەتی كارەبای هەرێمی كوردستان كە لە لایەن كەمال محەمەد ساڵح وەزیری كارەبا خرایەڕوو.

لە دوا تەوەری كۆبونەوەكەدا، سامان بەرزنجی وەزیری تەندروستی، ڕاپۆرتێكی سەبارەت بە ڤایرۆسی گۆڕاوی كۆرۆنا و پلانی وەزارەتەكەی دەربارەی ڕێكارە تەندروستییەكان بۆ ڕووبەڕووبونەوەی ئەم جۆرە گۆڕاوەی ڤایرۆسەكە خستەڕوو .

دواتر ئالان حەمە سەعید وەزیری پەروەردە، دڵنیایی دا لەسەر بەردەوامبوونی خوێندن بە مەرجی ڕەچاوكردنی ڕێكارە تەندروستیەكان لە پێناو پاراستنی سەلامەتی و ژیانی قوتابیان و خوێندكاران ومامۆستایان و كارمەندانی پەروەردە و ناوەندەكانی خوێندن.

ئەنجومەنی وەزیران ، سەرەڕای سوپاسكردنی وەزارەتی تەندروستی و وەزارەتە پەیوەندیدارەكانی دیكە ، لە هەمانكاتدا وەزارەت و فەرمانگەكانی حكومەتی ڕاسپارد كە ڕێكارەكانی خۆپارێزی و ڕێنماییە تەندروستییەكان لە بەرچاو بگرن ، داواشی لە هاووڵاتیان كرد كە هاوكاری جێبەجێكردنی پلان و ڕێكارەكانی حكومەتی هەرێم بن بۆ بەرگرتن لە زیاتر بڵاوبونەوەی ئەم ڤایرۆسە گۆڕاوەی كۆرۆنا.