سەردێر

بۆ مەڕاسیم و ئاهەنگی نەورۆز بڕیار درا

خەڵك-

ژووری ئۆپراسیۆنەكانی پارێزگای هەڵەبجە بۆ ڕووبەڕووبوونەوەی كۆرۆنا بڕیاریدا بەجێبەجێ‌ كردنی بڕیارەكانی لیژنەی باڵای ڕووبەڕووبوونەوەی كۆرۆنای هەرێم و بۆ ئەوەش هەموو چالاكی و مەڕاسیم و ئاهەنگەكانی مانگی ئازار و نەورۆز قەدەغە دەكرێن.

ئازاد تۆفیق، پارێزگاری هەڵەبجە بۆ (خەڵك) ڕایگەیاند، ئەمڕۆ سێ شەممە ٢٠٢١/٢/٢٣ ژووری ئۆپراسیۆنەكانی پارێزگای هەڵەبجە بۆ ڕووبەڕووبوونەوەی كۆرۆنا كۆبووەوە و جەختی كردەوە بەپێی ئەو بڕیارانەی لەوەزارەتی ناخۆ و لیژنەی باڵای ڕووبەڕووبوونەوەی كۆرۆنا دەرچوون، چاودێری سەرجەم شوێنە گشتییەكان و ناوەندەكانی خوێندن بەتایبەتی بكرێت و ماسك ببەسترێت.

وتیشی، “هەموو پارێزگاكان پابەندی دوو ڕێنمایین، كە ڕێنمایی وەزارەتی تەندروستی و ڕێنمایی وەزارەتی ناوخۆیە، كە جەختیان كردۆتەوە لە بەستنی ماسك و دووركەوتنەوە لە قەرەباڵغی و دروست نەبوونی كۆڕ و كۆبوونەوە”.

ڕاشیگەیاند: بەگوێرەی بڕیارەكانی كۆبوونەوەكە، هەموو گردبوونەوە و كۆبوونەوە و ئاهەنگێك لەمانگی ئازاردا قەدەغەیە.

سەبارەت بە یادی كیمیاباران، پارێزگاری هەڵەبجە جەختی كردەوە، خەڵكی هەڵەبجە لە ساڵی 1989وە یادی كیمیاباران دەكاتەوە و ئەو یادە لە دڵ و ناخ و ڕۆحماندایە، بەڵام شێوەی یادەكە وەكو ساڵانی ڕابردوو نابێت، كە لە هۆڵدا بكرێتەوە و قەرەباڵغی دروست بكرێت، بۆیە بە شێوازێكی دیكە بە كەمترین قەرەباڵغی و بەریەككەوتن ئەو یادە دەكەینەوە.