سەردێر

میرانی: پارتی زۆرترین بەرپرسیاریەتی لە ئەستۆیە

خەڵك-ئارام سەردار
لە مەڕاسمێكدا ڕێز لە سكرتێرەكانی پێشوویی یەكێتی قوتابیانی كوردستان نرا و سكرتێری مەكتەبی سیاسی پارتی دیموكراتی كوردستان ڕایگەیاند، پارتی ڕۆڵی بینیوە لە بانگەوازی كورد بە ڕووی دنیادا، كە بڵێ میللەتێك هەیە بەناوی كورد، جگە لەوەی بەرپرسارەتی ئەم قۆناغەی كوردستان لەئەستۆی حزب و لایەكانە پارتی زۆرترین بەرپرسیارەتی لە ئەستۆیە و جەختیشی كردەوە ٢٦ی مانگی ٥ی ئەمساڵ پارتی كۆنگرەی چواردەهەمینی خۆی دەبەستێت.

فازڵ میرانی، سكرتێری مەكتەبی سیاسی پارتی دیموكراتی كوردستان لەمەڕاسیمەكەدا ڕایگەیاند، قۆناغی دامەزراندنی یەكێتی قوتابیانی كوردستان قۆناغێكی هەستیار و پێویست بوو، قوتابخانەی زۆرێك لەبەرپرس و كەسایەتییە كاریگەر و خاوەن بڕیارەكانی ئێستای كوردستانە، بۆیە پارتی لەسەر بنەمایەك كاری كردوە ئەویش دامەزراندنی سیستەمێكی سیاسی و ئیداری بۆ كوردستان وەك وڵاتێكی فرەنەتەوە و ئایین و ئینتمای سیاسی، تاوەكو ناسنامەی خۆمان هەبێت.

دەشڵێت: “ڕێكخراوەكە لەسەر بنەمای سیاسەتی پارتی، كە ڕزگاری كوردستانە كاری كردوە، مێژوویەكی گەشی ئێمەش ئەوەیە پارتی ڕۆڵی هەبووە لەوەی بەدونیا بڵێ میللەتێك هەیە بەناوی كورد لەژێر دەستی ستەمدا دەژیت، ئەویش دوای ئەوەی ڕووبەڕووی ئەو ستەمە بوویەوە بەخەباتی سیاسی و چەكداری و دانوستان”.

سكرتێری مەكتەبی سیاسی پارتی باسی لەوەشكرد، پارتی دوێنێی لەبەرچاوە، بۆیە بایەخێكی تایبەت دەداتە ئەمڕۆ و پارێزگاری لێ دەكات، چونكە دوێنێ مێژوویەك بوو كەهی خەڵكی كوردستانە و پشكی شێریش زیاتر بەر پارتی دەكەوێت، لەبەر ئەوە ئەركی ئێمە دەستكەتەكان بپارێزین بۆئەوی مێژووی خۆمان بەرز ڕابگرین، ڕاستە كەمووكوڕی هەیە، بەڵام دەوڵەت هەیە 100 ساڵە وڵاتە كەم و كوڕی لەئێمە زیاترە، پێویستە خۆشمان بەر لەڕاپەڕین و دوای ڕاپەڕین ببینین و دەستكەوتەكان بپارێزین، ئەو بەرپرسیارەتییەشی هەیە بەشێكی دەكەوێتە سەر شانی تەواوی حزبەكانی كوردستان، بەڵام پشكی شێری دەكەوێتە سەر شانی پارتی، بۆیە ئەوەی دەكەوێتە سەر شانمان دەبێ بەوپەڕی بەرپرسیارەتییەوە ئەنجامی بدەین، كەمو كوڕیەكانیش دەستنیشان بكەین.

میرانی ڕاشیگەیاند، داوا لەهەموو ڕێكخراوە قوتابی و خوێندكاریەكان دەكەم بیر لەخۆیان و وڵاتەكەیان بكەنەوە و ئەوەی فێری دەبین لەزانكۆ بۆ میللەتەكەیان بەكاری بێنن و دەستكەوتەكانی پێ بپارێزن و وەڵات پێشبخەن وەك سەرمایەكی گرنگی ئەو وڵاتە.

سەبارەن بە هەلی كار دوای زانكۆ وتی، “مافی قوتابیان ئەوە نییە زانكۆی تەواو كرد داوای دامەزراندن بكات، بەڵكو دەبێت هەلیكار بڕەخسێنرێت بۆ قوتابیان نەك دامەزراندن لە حكومەتدا”.