سەردێر

پارتی كاتی بەستنی كۆنگرەی حزبەكەی دیاریكرد

خەڵك-
پارتی دیموكراتی كوردستان كۆنگرەی 14ی حزبەكەی دەبەستێت و تێیدا ژمارەیەك ئەنجامی مەكتەبی سیاسی دەستەبەرداری پۆستەكانیان دەبن و كادری گەنج شوێنەكانیان پڕدەكەنەوە و سكرتێری مەكتەبی سیاسی ئەو حزبەش دەڵێت: “لە 26ی ئایار كۆنگرە دەبەستین”.

فازڵ میرانی، سكرتێری مەكتەبی سیاسی پارتی دیموكراتی كوردستان لە پەراوێزی مەڕاسیمی یادی ڕێكخراوی قوتابیانی حزبەكەی بۆ ڕۆژنامەونووسان وتی، “پارتی لەمساڵدا كۆنگرەی خۆی دەبەستێت و بۆ ئەوەش ڕۆژی 26ی ئایار دیاری كراوە”.

بەپێی زانیارییەكانی (خەڵك)، پارتی دیموكراتی كوردستان لە كۆنگرەی ١٤ی خۆیدا ڕێژەی ژنان لە سەركردایەتی بۆ 20% بەرزدەكاتەوە و بەشێكی ئەندامانی ئێستای مەكتەبی سیاسی بەهۆی تەمەن یان لایەنی تەندروستییەوە دەستبەرداری پۆستەكانیان دەبن و لەبەرامبەریشدا ژمارەیەك ئەندامی سەركردایەتی بەپێی دابەشكردنی جوگرافی دەبنە ستافی نوێی مەكتەبی سیاسی.

هەر بەپێی زانیارییەكان، پارتی دیموكراتی كوردستان كۆنگرەی ئاسایی خۆی لە شاری هەولێر دەبەستێت و ماوەی 3 ڕۆژ دەخایەنێت.

بۆ وەرگرتنی زانیاری زیاتر لەوبارەیەوە، (خەڵك) چەند جارێك پەیوەندی كرد بە مەحمود محەمەد، ئەنجامی مەكتەبی سیاسی و وتەبێژی پارتییەوە، بەڵام پەیوەندییەكان بەردەست نەبوون.