سەردێر

دەنگ لەسەر ڕەشنوسی پڕۆژەی دژایەتی گەندەڵی دەدرێت

خەڵك-ئارام سەردار
سەرۆكی دەستەی دەستپاكی هەرێم رایدەگەیەنێت پێشبینی دەكرێت لە دوو هەفتەی داهاتوو دەنگ لەسەر ڕەشنووسی پڕۆژەى دژایەتی گەندەڵی بدرێت.

د.ئەحمەد ئەنوەر، سەرۆكی دەستەی دەستپاكی هەرێم لە چاوپێكەوتنێكدا لەگەڵ خەڵك وتی، گەندەڵی پەتایەكی ترسناكە و هەڕەشە لە لاوازبوونی دامەزراوەكان دەكات و داهاتێكی زۆر بەهەدەر دەڕوات، بۆیە پڕۆژەیەكمان بەناوی ڕەشنووسی ستراتیژی نیشتیمانی بۆ دژایەتی گەندەڵی پێشكەش بەئەنجوومەنی وەزیران كردووە .

ئاماژەی بەوەشكرد، لە ساڵی لە٢٠١٧ بڕیاری لەسەردرا بەڵام كاری پێ نەكرا، كابینەی نوێ كە گەندەڵی لەهێڵە گشتیەكانی دانا، ساڵی ڕابردوو هەمواری ستراتیجیەكەمان كردوە بۆ گونجان لەگەڵ هێڵە گشتیەكانی حكومەت بۆ ڕووبەڕووبونەوەی گەندەڵی، ئێستا ڕەوانەی وەزارەتەكان كراوە ڕای خۆیان لەسەر بدەن، پێشبینی دەكرێت لە دووهەفتەی داهاتوو دەنگی لەسەر بدرێت، پڕۆژەكەش لەهەموو ئەو وڵاتانەی گرنگی بەدژایەتی گەندەڵی دەدەن كاری پێدەكرێت.

وتیشی، پڕۆژەكە بۆ پێنچ ساڵە و UNDP بەفەندێكی گەورە هاتۆتە پێشەوە پاڵپشتی لەجێبەجێكردنی ستراتیجەكە دەكات بۆ ئەوەی لەچوارساڵی داهاتوو جێ بەجێ بكرێت، لەڕووی دابینكردنی پێداویستی و شارەزای دەرەكی، دەبێتە هۆكارێك تاوەكو حكومەت چی بكات بۆ پێشخستنی دامەزراوەكانی و كەمكردنەوەی كەلێنەكانی گەندەڵی و چالاككردنی دەزگاكان.