پەڕلەمانتارێك ناوی ئەو بەرپرسانەی ڕێگە بە لەشفرۆشی دەدەن ئاشكرادەكات

سەردێر

خەڵك-
سەرۆكی فراكسیۆنی یەكگرتوو لە پەڕلەمانی كوردستان ڕایدەگەیەنێت، لە هەولێر و سلێمانی دیاردەی لەشفرۆشی و بارزگانیكردن بە ژنان و گواستنەوەی ماددەی هۆشبەر پێیان بوونی هەیە و دەشڵێت: “بەرپرسانی حكومی و حزبی و بازرگانەكان لە پشت ئەو كارانەوەن، بۆیە ڕێكارە یاساییەكان دەگرینەبەر تا ئاشكراكردنی ناوەكانیان”.

د. شێركۆ جەودەت، سەرۆكی فراكسیۆنی یەكگرتوو لە پەڕلەمانی كوردستان بۆ (خەڵك) ڕایگەیاند، دیاردەی لەشفرۆشی لە هەرێمی كوردستان پەرەیسەندووە، كە دیاردەیەكی مەترسیدارترە لە داعش، چونكە داڕمانی ئەخلاقی دروستكردووە و ئەوەشی ڕوودەدات حكومەت بەرپرسی یەكەمە، چونكە بە ڕەهایی ڕێگەی پێدراوە و بەبەرچاوی بەرپرسەكان بە تیم ڕێك ئەخرێن بۆ ئەو كارانە.

وتیشی، “لەگەڵ داواكاری گشتی دانیشتووین وەك تەواوكاری یەكتری هەماهەنگ ئەبن بۆ ئەم دیاردانە و بڕیارە هەوڵی جدی بدرێت ئێمەش وەك پەڕلەمانتاران هاوكار دەبین، كە كۆمەڵێك بەرپرس و دەستڕۆیشتوو لە حكومەت و لە حزب لە پشتیانەوەن، كاری لەشفرۆشی و بازرگانی ماددەی هۆشبەر بە كچانەوە دەكرێت”.

ڕاشیگەیاند، لە سلێمانی بەفیڕۆدان هەیە بۆ چەند بەرپرسێكی دەستڕۆیشتوو، كە وایكردووە شارەكە ڕووبەڕووی بەهەدەردانی زەوی و زارەكەی ببێتەوە، كە ئەمە لەسەر حسابی قوتی هاووڵاتیان ئەنجام دەدرێت، هەروەها ئەوەشمان لەگەڵ داواكاری گشتی تاووتوێ كردووە.

شێركۆ جەودەت ئاماژەی بۆ ئەوەشكرد، كە بە ئاشكرا لە پایتەخت ژنان ئەهێنن لەدەرەوە و دەشڵێت: “ناوی هەموو ئەو بەر پرسانە ئاشكرا دەكەین، كە بازرگانی بە ژنان و بە ماددەی هۆشبەرەوە دەكەن و ژنان و كچان لە وڵاتانی دەرەوە دەهێنن بازرگانیان پێوە دەكەن و تلیاكیان پێ ئەگوازنەوە و لەگەڵ دیاردەی لەشفرۆشیەكەش ماددەی بێهۆشكەریان پێ ئەفرۆشن”.

باسی لەوەشكرد، ئەگەر دەسەڵاتەكان لە هەرێم كارابن ئەم دیاردانە كۆنتڕوڵ ئەكرێن، بەڵام ئیفلیجی بنەمای حكومڕانی وایكردووە ئەمانە دروست ببن، بۆیە پێویستە شۆڕشی مەدەنی بكرێت بۆ ڕێگریكردن لەمەی ڕوویداوە، كەسانی دەستڕۆیشتوو لە پشتیانە، بۆیە ڕووبەڕووی ئێمە دەبنەوە، لە سلێمانی و هەولێر زۆرن و چەندین شوێنی شەوانە بوونیان هەیە.

ئەوەشی خستەڕوو، لە ئێستادا داواكاری گشتیمان لێ ئاگاداركردووە و هەماهەنگ دەبین لەگەڵیان و هاوكارییان دەكەین، بەڵام ئەبێ ڕێكاری یاسایی بگیرَیتەبەر و ئەوانەی لە پشتەوەن هەموویان ئاشكرا دەكەین.