سەردێر

“ئیسلامییەكان نابنە جێگەی ئومێدی خەڵك”

چاودێران بە پێویستی دەزانن  حزبە ئیسلامییەكان زیاتر بە ڕووی كۆمەڵگەی كوردیدا بكرێنەوە

خەڵك-
چاودێرێكی سیاسی سەبارەت بە كۆنگرەی چوارەمی كۆمەڵی ئیسلامی دەڵێت كۆمەڵی ئیسلامی بەم قەبارەو شێوازەی ئێستایەوە، ناتوانێت ببێتە جێگەی ئومێدی خەڵكێكی زیاتر و ئەمە سەبارەت بەسەرجەم ئیسلامییەكان ڕاستە.

ئەبووبەكر كاروانی چاودێری سیاسی و ئەندامی پێشووی مەكتەبی سیاسی یەكگرتووی ئیسلامی كوردستان دەڵێت، دانپێنانێكی لێپرسراوانەو راستگۆیانەی ئەمیری كۆمەڵی ئیسلامی مامۆستا عەلی باپیر، لەگوتاری كردنەوەی كۆنگرەی چوارەمی حیزبەكەیدا كە دەڵێت، كۆمەڵی ئیسلامی بەم قەبارەوشێوازەی ئێستایەوە، ناتوانێت ببێتە جێگەی ئومێدی خەڵكێكی زیاتر و ئێمەش دەڵێین ئەمە سەبارەت بەسەرجەم ئیسلامییەكان ڕاستە.

ئەمە لە كاتێكدایە ئەمڕۆ كۆنگرەی چوارەمی كۆمەڵی ئیسلامی بەڕێوە دەچێت و بڕیارە ئەمیرێكی نوێ‌ بۆ حزبەكە هەڵبژێردرێت.

بەپێی زانیارییەكان عەلی باپیر جارێكی دیكە بە ئەمیری كۆمەڵی ئیسلامی كوردستان هەڵدەبژێردرێتەوە.

لە ماوەی رابردوودا حزبە ئیسلامییەكان جگە لە نوێنەرایەتیكردنی بەشێكی كەمی خەڵكی كوردستان كە لە باشترینیدا 17%ی تێپەڕنەكردووە، نەیانتوانیوە ببنە جێی خواستی زۆرینەی خەڵكی كوردستان.

لەسەر ئاستی كاری رێكخراوەییشدا حزبە ئیسلامییەكان هێندەی دابەشبوون بەسەر بەرەی حزبە فەرمانڕەوانكاندا نەیانتوانیوە لەنێو خۆیاندا پێكبێن، بەرەیەك دروست بكەن، هەوڵەكانیان لەمبارەیەوە شكستی هێناوە.

ئێستا باس لەوە دەكرێت كۆمەڵ و یەكگرتوو جارێكی دیكە لە هەوڵی پێكهێنانی بەرەیەكدان بۆ هەڵبژاردنەكانی پەرلەمانی عێراق، بەڵام بە رای چاودێران سەركەوتوو نابن لە ئەم هەنگاوەشیاندا.

حزبە ئیسلامییەكان ناچارن بۆ هەڵبژاردنەكانی ئەم جارەی پەرلەمانی عێراق كە بڕیارە لە پایزی ئایندەدا ساز بكرێت، لەنێوخۆیاندا بەرەیەك دروست بكەن یان بچنە بەرەی حزبە فەرمانڕەواكانەوە، چونكە یاسای هەڵبژاردن گۆڕانكاری تێدا كراوە، حزبە بچوكەكان ناتوانن بە تەنها هیچ كورسییەك بەرنەوە.

بە رای چاودێرانی سیاسی هۆكاری گەشەنەكردنی حزبە ئیسلامییەكان یان بچووكبوونەوەیان پەیوەندی هەیە بە شێوازی كاری ئەوان كە زۆر سنووردارە، زۆرینەی هاووڵاتیان ناتوانن لەچوارچێوەی پرۆژە و كارەكانیاندا خۆیان ببیننەوە، بەڵكو بۆ كۆمەڵێك خەڵكی دیاریكراوە، ئەمەش بەهۆكاری پابەندبوونی ئەو حزبە ئیسلامیانە بە هەندێك رەوتی ئاینی دیكەی ئیخوان و سەلەفییەوە كە كۆمەڵگەی كوردی بەگشتی لەگەڵ ئەو رەوتانەدا رانەهاتووە.

چاودێران بە پێویستی دەزانن  حزبە ئیسلامییەكان زیاتر بە ڕووی كۆمەڵگەی كوردیدا بكرێنەوە و گوتار و پەیامەكانیشیان بوێرانەتر بەڕووی فەرمانڕەواكانی هەرێمدا بەرز بكەنەوە، گەرموگوڕتر بەرگری لە مافەكانی خەڵك بكەن.

لە هەرێمی كوردستاندا یەكگرتووی ئیسلامی، كۆمەڵی ئیسلامی، بزوتنەوەی ئیسلامی لەگەڵ رەوتی سەلەفییەكان و ژمارەیەك رێكخراو و گرووپی دیكەی ئیسلامی سەرقاڵی كاری سیاسی و رێكخراوەین، بەڵام گوتاری ئەو لایەنانە نە ئۆپۆزسیۆنێكی تەواوە، نە بەشداری دەسەڵاتیشن، بۆیە بەردەوام روبەڕووی رەخنە بوونەوە.

رەخنەیەكی دیكە كە روبەڕووی حزب و لایەنە ئیسلامییەكان دەبێتەوە نەگۆڕینی دەموچاوەكانە، بەتایبەت سەركردەكانی یەكەمیان بەردەوام دووبارە دەبنەوە.

هاوكات بەشداریكردنی زۆرینەی سەركردەی حزبە ئیسلامییەكانە لە پۆستەكانی پەرلەمان و حكومەت و وەرگرتنی خانەنشینی و ئیمتیازاتە زۆرەكان لە هەرێمی كوردستان و عێراق كە جێگەی نیگەرانی زۆری خەڵكە.

 

 



هەلبژاردە

گرنگترینەکان