سەردێر

هەرێم لەبارەی قەدەغەكردنی هاتووچۆوە بڕیار دەدات

چاو لە بەغدا ناكات

خەڵك-
وتەبێژی وەزارەتی تەندروستی حكومەتی هەرێمی كوردستان، ئاماژە بە چاودێری وەزارەتەكەیان دەكات بۆ ڕەوشی تەندروستی لە هەرێم، بەبێ‌ ئەوەی بڕیاری نوێ‌ بدات، هەرچەندە لەم چەند ڕۆژەی ڕابردوودا ژمارەی تووشبوان بە كۆرۆنا بەشێوەیەكی بەرچاو ڕووی لە بەرزبوونەوە كرد.

ئاسۆ حەوێزی، وتەبێژی وەزارەتی تەندروستی حكومەتی هەرێمی كوردستان لە لێدوانێكی ڕۆژنامەوانیدا ڕایگەیاند”سەپاندنەوەی قەدەغەكردنی هاتووچۆ و ڕێگرتن لە جوڵەی گواستنەوە زۆر قورسە و لەئێستادا لە بیركردنەوەماندا نییە وەك ئەوەی بەغدا كردی، چونكە ڕەوشەكە بە بۆچوونی ئێمە باشە و ئەو ڕێكارانەش زیان بە هاووڵاتیان دەگەیەنێت و دەبێتە مایەی ئیفلیجكردنی جوڵەی ئابوری”.

بە وتەی حەوێزی”دەروازەكانی هەرێم لەگەڵ پارێزگەكانی عیراقدا كراوەتەوە، ئەمە مایەی نیگەرانییە لەگەڵ تۆماركردنی تووشبوون بە جۆرە نوێیەكەی كۆرۆنا لەو پارێزەگەیانە، بەڵام گونجاوترین ڕێكار لەئێستادا پابەندبوونە بە ڕێكارەكانی خۆپاراستن و دووركەوتنەوە لە یەكتر، بۆ كەمكردنەوەی ژمارەی تووشبوان”.

پێشتر سامان بەرزنجی وەزیری تەندروستی هەرێمی كوردستان لە بەیاننامەیەكدا ڕایگەیاند”ئاماری تووشبوان بە كۆرۆنا لە هەرێم، پێویستە بەوەناكات جارێكی تر قەدەغەكردنی هاتووچۆ بسەپێنرێت”.

وتیشى، “هێشتا دۆخى هەرێم نەگەیشتووەتە ئەو دۆخەى عێراق کە پێویست بە رێکارى دیکە بکات، بەڵام هەندێ رێکارى تر هەیە لەگەڵ وەزارەتى ناوخۆ سەرقاڵى تاوتوێکردنین، بەتایبەتى جوڵە و هاتوچۆى نێوان شارەکان کە رەنگە میکانیزمى بەدواداچوونى بۆ دابنرێت، لەکاتى بوونى بە بڕیاریش رادەگەیەنرێت”.