سەردێر

گەشتەكانی فڕۆكەخانەی هەولێر دەستیان پێكردەوە

 

خەڵك-ئارام سەردار
بەڕێوەبەری گشتی فڕۆكەخانەی نێودەوڵەتی هەولێر ڕایگەیاند، لە كاتژمێر ١٢ی نیوەڕۆی ئەمرۆوە گەشتەكانی فرۆكەخانەی هەولێر ئاسایی بوونەتەوە و هیچ كێشەیەك نەماوە.

ئەحمەد وشیار، بەڕێوەبەری گشتی فڕۆكەخانەی نێودەوڵەتی هەولێر لەكۆنفڕانسێكی ڕۆژنامەوانیدا ڕایگەیاند، لەكاژمێر ٩:٣٠ی خولەكی شەوی ڕابردوو دەنگی تەقینەوەیەك لەفڕۆكەخانەی نێودەوڵەتی هەولێر بیسترا و ئاسایش دەستی كرد بەپشكنینی فڕۆكەخانە كە سێ مووشەك لەنزیك سیاجی فڕۆكەخانە كەوتبوونە خوارەوە.

ئەوەشی خستەڕوو، دوای تەواوكردنی پشكنین لەكاتژمێر ١٠ی شەو تاوەكو ١٢ نیوەڕۆ فڕۆكەخانەمان داخست بەمەبەستی سەلامەتی هێڵە فڕۆكەوانیەكان و گەشتیاران، لە كاتژمێر ١٢ی نیوەڕۆ گەشتەكان دەستی پێكردۆتەوە و دڵنیایش دەدەدەینە هاوڵاتیان هیچ كێشەیەك نەماوە.

دەشڵێت، لەئەنجامی ئەو هێرشە ٥ فەرمانبەر برینداربوون و یەك فەرمانبەریش گیانی لەدەستدا و ئەو فەرمانبەرانە لەگەڵ كۆمپانیاكانی سەر بەهاوپەیمانان كاردەكەن.