سەردێر

بەفر و باران دەستپێدەكات

پلەكانی گەرما نزیكەی 9 بۆ 11 پلە نزمدەبنەوە

 

خەڵك-

بەڕێوەبەرایەتی گشتی كەشناسی هەرێم رایگەیاند، لە ڕۆژی چوارشەممەوە شەپۆلێكی باران و بەفربارین هەرێمی كوردستان دەگرێتەوە.

بەڕێوەبەرایەتی گشی كەشناسی و بوومەلەرزەزانی هەرێم لە ڕاگەیەنراوێكدا بڵاویكردووەتەوە: بەیانی ڕۆژی چوارشەممە هەرێمی كوردستان دەكەوێتە ژێر درێژبوونەوەی نزمە پاڵەپەستۆی دەریای سپی ناوەڕاست و شەپۆلێكی باران بارین و باران و بەفر زۆربەی ناوچەكانی هەرێمی كوردستان دەگرێتەوە.

لەڕاگەیەنراوەكەدا ئەوەش هاتووە، لەگەڵ باران بارین خێرایی با بۆ سەرو 30 كم لە كاتژمێرێكدا بەرزدەبێتەوە بە تایبەت لە ناوچەكانی باشوری هەرێم لە شەوی چوارشەممەوە، هاوكات پلەكانی گەرما نزیكەی 9 بۆ 11 پلە نزمدەبنەوە و لە ناوچە شاخاوییەكانیش بۆ پلەی سفری سلیزی نزمدەبێتەوە.

بەگوێرەی پێشبینییەكانی كەشناسی شەوی چوارشەممە بەفربارین زۆرینەی ناوچە شاخاوییەكان دەگرێتەوە و ڕۆژی پێنجشەممەش بەشێك لە قەزا و ناحییەكان دەگرێتەوە و نزمبوونەوەی پلەكانی گەرما رۆژی هەینیش بەردەوام دەبێت و كاریگەری شەپۆلەكە تاوەكو نیوەڕۆی ڕۆژی شەممە بەردەوام دەبێت.