سەردێر

رەوشی خوێندن تاووتوێدەكرێت

خەڵك-
بڕیارە ئەمڕۆ لیژنەی پەروەردەی پەڕلەمانی كوردستان لە بارەی دۆخی پەروەردەی هەرێم كۆ ببێتەوە.

گەلاوێژ عوبێد بڕیاردەری لیژنەی پەروەردەو خوێندنی باڵاو توێژینەوەی زانستی لە پەڕلەمانی كوردستان بە (خەڵك)ی ڕاگەیاند، ئەمڕۆ كاتژمێر 11 وەك لیژنەی پەروەردە لەپەرلەمانی كوردستان كۆدەبینەوە سەبارەت بە دۆخی پەروەردەی هەرێمی كوردستان.

وتیشی” ئەوەی جێگەی دڵخۆشییە ئامارەكانی كۆرۆنا لە هەڵكشان نییەو سەرجەم ناوەندەكانی خوێندن كراوەن”.

ئاماژەی بەوەشكرد، هیچ لایەنێكی پەروەردەیی لە كۆبونەوەكەدا بەشدار نابێت و تەنها خودی لیژنەی پەروەردەی پەرلەمان گفتوگۆ دەكەن.

ئەم كۆبونەوەیە لە كاتێكدایە دوێنێ لە عێراق و هەرێمی كوردستان ئامارەكانی توشبووانی كۆرۆنا بەرزبوونەوەیان بەخۆیانەوە بینیوە.

دوێنێ وەزارەتی تەندروستی هەرێمی كوردستان هۆشداری دا لە ئەگەری بەرزبوونەوەی ئامارەكانی بۆ جارێكی دیكە، بۆیە داوای خۆپارێزی زیاتری كرد بەتایبەت لەگەڵ دووهێندەبوونی ئامارەكان لە عێراق.

هەرچەندە قوتابخانەكان بە بڕیاری لیژنەی بەرەنگاربوونەوەی كۆرۆنا كراونەتەوە، بەڵام هەر كاتێك ئامارەكانی كۆرۆنا زیاتر بن، دەرگەی قوتابخانەكان دادەخرێنەوە.

تا ئێستا لە سنوری پارێزگای هەولێر قوتابخانەیەك بەهۆی بوونی كۆرۆنا تێیدا داخراوە و لە سنوری سلێمانیش قوتابخانەیەك كۆرۆنای تێدا تۆماركراوە.