سەردێر

پەكەكە بۆ (خەڵك): توركیا بۆ ڕزگاركردنی سوپاكەی لە گارە هانای بۆ ئەمریكا و حزبێكی باشوور برد

خەڵك-
بەرپرسی پەیوەندییەكانی پارتی كرێكارانی كوردستان (پەكەكە) ڕایدەگەیەنێت، لە یەكەم هێرشی توركیا بۆ سەر چیای گارە 41 فڕۆكەی جەنگی ناوچەكانی بۆردومان كرد، دەشڵێت: “توركیا بۆ داگیركردنی باشووری كوردستان لە گارە بەدەستی گەریلاكان یەكەم شكستی 2021ی تۆماركرد”.

كاوە شێخ موس، بەرپرسی پەیوەندییەكانی پارتی كرێكارانی كوردستان بۆ (خەڵك) ڕایگەیاند، لەیەكەم شەوی هێرشەكانی توركیا بە نیازبوو بەهۆی زۆری بۆردومانەكانی گارە، گەریلا بترسێنن و ئیتر نەتوانن شەڕ بكەن، بەڵام گەریلا بە هونەری جەنگی نوێیوە توانی تەواوی هێرشەكان بشكێنێت و ئەو پلانەی سێ ساڵە بۆ داگیركردنی باشووری كوردستان دایناوە شكست پێ بهێنن.

وتیشی، “41 فڕۆكەی جەنگی لەیەكەم ڕۆژی شەڕەكەی گارە بۆردومانی زۆرێك لە ناوچەكەیان كرد، هەر زوو گەریلا توانی خۆڕاگربێت و توركیا شكستی خۆی ببینێ لەسەر دەستی گەریلا، كە توركیا هەرگیز بیری لەوە نەكردبووەوە بەوشێوەیە لە گارە شكست بهینێت، چونكە گارەی كردبووە یەكەم شوێنی داگیركاری باشووری كوردستان ئەوجا كەركوك و شنگال و موسڵیش لە چوارچێوەی بەرنامەكەیدا بوو”.

ڕاشیگەیاند، لەچەند كاتژمێری ڕابردوودا كاتێك گەریلا گەمارۆی سوپای توركیای دا، ئەنقەرە هانا بۆ ئەمریكا و حزبێكی باشووری كوردستان دەبات بۆئەوەی نێوەندگیری بكەن بۆئەوەی پەكەكە ڕێگە بەو سەربازانەی توركیا بدەن بكشێنەوە، بەڵام پەكەكە دەرفەتی كشانەوەی بەتوركیا نەدا و بەتوندی لەسوپای ئەو وڵاتەی دا.