سەردێر

زیاتر لە 12 ملیۆن سوریایی برسیانە

خەڵك-

بەرنامەی خۆراكی سەر بە نەتەوە یەكگرتووەكان ئاشكرایكرد 12.4 ملیۆن سوریایی پێویستیان بە خۆراكە.

رێكخراوی خۆراكی سەر بە نەتەوە یەكگرتووەكان ئاماژەی بەوەكردووە 60%ی دانیشتووانی سوریا دەناڵێنن بە دەست نەبوونی ئاسایشی خۆراكەوە، بەپێی دواین هەڵسەنگاندنەكانی 2020.

رێژەی ئەو كەسانەشی بە دەست نەبوونی ئاسایشی خۆراكەوە دەناڵێنن، 3 ملیۆن كەس زیادیكردووە لە مانگی ئایاری رابردووەوە، بە جۆرێك لە ئەو مانگەدا 9.3 ملیۆن بووە.

وتەبێژی بەرنامەی خۆراكی جیهانی جیسیكا لوسون بۆ ئاژانسی دەنگوباسی فرانس پرێس دەڵێت: زیاتری سوریاییەكان برسی و هەژار دەبن و بە دەست نەبوونی ئاسایشی خۆراكەوە دەناڵێنن ئێستا زیاتر لە هەركاتێكی دیكەی رابردوو.

جەنگی نێوخۆیی 10 ساڵەی سوریا ئابووری سوریای وێرانكردووە و رێژەی هەڵئاسانی زیادكردووە لە سەرانسەری وڵاتدا.

نرخی كەرەستەی خۆراكی 33 هێندەی ئاستی نێوەند بەرزتر بووەتەوە بەراورد بە 5 ساڵی پێش شەڕ.

هاوكات پەتای كۆرۆنا و قەیرانی دارایی لوبنان، كێشە ئابوورییەكانی سوریاشی زیاد كردووە.

لوسون دەڵێت: رەوشی ئابووری سوریا كاریگەری گەورەی لەسەر ژیانی خێزانەكان دروستكردووە، ئەوان هیچیان بۆ نەماوەتەوە دوای ساڵانێك لە جەنگ، ئێستا زۆرینەیان پشت دەبەستن بە هاوكارییە مرۆییەكان بۆ مانەوەیان لە ژیاندا.