سەردێر

بەرهەم ساڵح، پیرۆزبایی “كەشتی هیوا” لە ئیمارات دەكات

خەڵك-

سەرۆك كۆماری عێراق لەگەڵ شێخ محەمەد بن زاید جێنشینی ئەبو زەبی كۆبووەوە.

د.بەرهەم ساڵح سەرۆك كۆماری عێراق لەمیانی سەردانێكی بۆ وڵاتی ئیمارات چاویكەوت بە شێخ محەمەد بن زاید، جێنشینی ئەبو زەبی و گفتوگۆكرا سەبارەت بە پەیوەندییە دووقۆڵییەكانی نێوان عێراق و ئیمارات و پێویستی پەرەپێدانی بۆ ئاستێكی بەرزتر بەجۆرێك خزمەت بە بەرژەوەندییەكانی هەردوو گەلی دۆست بكات.

لە كۆبوونەوەكەدا، سەرۆك كۆمار پیرۆزبایی لە سەركردایەتی و گەلی ئیمارات كرد، بەبۆنەی گەیشتنی كەشتیی “هیوا” بە سەركەوتوویی بۆ خولگەی هەسارەی مەریخ، ئەمەشی بە سەركەوتنێكی زانستی گەورە و شانازی بۆ گەلانی ناوچەكە دانا، ھەروەھا هیواشی خواست سەركردایەتی و گەلی ئیماراتی دۆست ھەمیشە لە خۆشگوزەرانی و پێشكەوتنی زیاتردا بن.

لای خۆشییەوە شێخ محەمەد بن زاید بەگەرمی سوپاسی سەرۆك كۆماری عێراقی كرد، لەبارەی خۆشحاڵی بۆ ئەو سەركەوتنەی كە وڵاتی ئیمارات بە دەستیھێناوە، ھاوكات جێنشینی ئەبو زەبی دووپاتیكردەوە كە دەوڵەتی ئیمارات بە بەردەوامی پشتیوانی دەكات لە گەلی عێراق لەپێناو ھێنانەدی ئاسایش و سەقامگیری و خۆشگوزەرانی.