سەردێر

“هەندێك لەدەستگیركراوانی دهۆك و هەولێر لەسەر ئیمۆجی گیراون”

خەڵك-

سكرتێری لقی سلێمانی سەندیكای ڕۆژنامەنووسانی كوردستان ڕایدەگەیەنێت، دەستگیركراوان هەولێر و دهۆك، نەك سیخوڕ نین، بەڵكو سەرجەمیان لەسەر دەربڕینی ڕای ئازاد دەستگیركراون تەنانەت لەناو ئەوانەدا كەسانێك هەن كەلەسەر ئیمۆجی و كۆمێنت و لایك دەستگیركراون.

كاروان ئەنوەر سكرتێری لقی سلێمانی سەندیكای ڕۆژنامەنووسانی كوردستان بەدەنگی ئەمركای ڕاگەیاند، بەهۆی بوونی تۆڕە كۆمەڵایەتییەكانەوە سەختە بتوانرێت خەڵكی ئاسایی و ڕۆژنامەوان لێكجیابكرێتەوە، هەرزەكار هەیە پەیجێكی هەیە 300 هەزار لایكی هەیە لەكاتێكدا حیزبی گەورە هەیە 20 هەزار لایكی نییە، لەبەرئەوە ڕۆژنامەنووسی كارێكی كردووە تێكەڵەیەك دروستبووە لەناو كاری ڕۆژنامەوانیدا كە هەموو كەسێك خۆی ڕۆژنامەنووسە، هەموو هاوڵاتیەك ڕۆژنامەنووسە ئەگەر لەسەر وشە هەركەسێك دەستگیر بكرێت، دەبێت حسابی ڕۆژنامەنووسی بۆ بكرێت.

وتیشی”لە سنووری لقەكەی خۆمدا ئەو كەسانەی لەسەر كاری ڕۆژنامەنووسی دەستگیردەكرێن ئەگەر بابەتەكەی ڕۆژنامەنووسی بێت و تەشهیر نەبێت و جنێودان نەبێت و سوكایەتیكردن نەبێت بەئایین و بەبارودۆخی ئاین و ئەوانە دەڕۆم یاسای كاری ڕۆژنامەوانی بەسەریاندا جێبەجێ دەكەین و بەكەفالەت ئازاد دەكرێت، بەڵام ئەوانەی كەگیراون هەندێكیان دەزانم لەسەر ئیمۆجی گیراون، هەیە لەسەر لایكێك گیراوە ئەوانە لەسنوری بادینان بەتایبەتی و ئینجا هەولێریش. كەسێك هەیە گیراوە لەبەرئەوەی گۆرانیەكی لەسەر پەرلەمان وتووە، بابەتێكی وتووە دەستگیركراوە”.

ئاشكراشیكرد، سكرتێری لقی سلێمانی سەندیكای ڕۆژنامەنووسانی كوردستان، نیگەرانم و زۆریش دەترسم كە ئازادی وردە وردە بەرتەسك بكرێتەوە و قۆرخ بكرێت و بكرێت بەوەی لەسەر وشە خەڵك بگیرێت.