سەردێر

بەڕێوەبەری ڕادیۆكانی هەرێم كۆبوونەوە

سلێمانی ـ نزار جەزا

ئەمڕۆ پێنج شەممە لەشاری سلێمانی بەبۆنەى ڕۆژی جیهانی ڕادیۆوە، دیدارێك بۆ بەڕێوەبەرانی ڕادیۆكانی هەرێمی كوردستان بەڕێوەچوو.

دیداری بەڕێوەبەرانی ڕادیۆكانی كوردستان لەلایەن سەندیكای ڕۆژنامەنوسانی كوردستان لقی سلێمانی بەهەماهەنگی لەگەڵ ڕێكخراوی دیالۆگ و كلتوور ئەنجامدەدرێت.

لەساڵی 2011 یونسكۆ ڕۆژی جیهانی ڕادیۆی دیاریكردووە پاشان یوئێنیش ڕۆژەكەی پەسەندكرد.

كاروان ئەنوەر سەرۆكی سەندیكای ڕۆژنامەنوسان لقی سلێمانی لەوتەیەكیدا ڕایگەیاند، ڕۆڵی ڕادیۆ لەساڵانی ڕابردوو نادیدەكراوە، بەڵام هێشتا پەیامی ڕادیۆ دەتوانێت پەیامی خۆی بگەیەنێت و بەسوود وەرگرتن لەتەكنەلۆژیا كاریگەری زیاتر دروستدەكات.

وتیشی”ڕادیۆ هۆكارێكە كە دەتوانێت بەبەهێزترین شێواز پەیامی خۆی بگەیەنێت”.

ئەوەشی خستەڕوو، ڕادیۆكانی شاخ هۆكارێكی زۆرباشبوو بۆ ڕۆشنبیركردنی تاكی كورد و كوردیان گەیاندە قۆناغێكی دیكە، بۆیە هەموومان قەرزارباری ڕادیۆكانی شاخین.

35 ڕادیۆ لەسەنتەری سلێمانی هەیە، 70 ڕادیۆ لەسلێمانی و دەوروبەری هەیە، 200 ڕادیۆ لەهەرێمی كوردستان هەیە.