سەردێر

ئیسرائیل و توركیا بەرەو ئاشتبوونەوە دەڕۆن

یەكەم فڕۆكەی ئیسرائیلی دوای 10 ساڵ لە ئیستەنبوڵ نیشتەوە

خەڵك-

لە ماوەكانی رابردوودا بە گەرمی هەواڵی نزیكبوونەوەی توركیا و ئیسرائیل بڵاوبووەوە لە مانگەكانی رابردوو دوای ساڵانێك لە هەڵبەز و دابەزی پەیوەندییە دبلۆماسییەكانیان بەهۆی هەڵوێستی ئەنقەرە لە دۆسێی فەڵەستین.

لە ئایاری 2018 هەردوو دەوڵەتی ئیسرائیل و توركیا باڵوێزەكانی خۆیان لەلای یەكدی كشاندەوە بەهۆی كوژرانی دەیان فەڵەستینی لەسەر دەستی هێزە ئیسرائیلییەكان لەسەر سنوری غەزە.

لە مانگی كانوونی یەكەمی ساڵی رابردوودا رەجەب تەیب ئەردۆغان سەرۆكی توركیا مەیلی ئەنقەرەی بۆ دووبارە ئاساییكردنەوەی پەیوەندییەكان لەگەڵ ئیسرائیل ئاشكراكرد.

سەرۆكی توركیا رایگەیاند وڵاتەكەی خوازیاری دووبارە بنیاتنانەوەی پەیوەندییەكانە لەگەڵ ئیسرائیل لە حاڵی گۆڕینی سیاسەتی ئیسرائیل بەرامبەر فەڵەستینییەكان كە تا ئێستا جێی رەمەزاندی نییە.

لە هەفتەی رابردوو یەكەم فڕۆكەی سەرنشینی ئیسرائیلی لە فڕۆكەخانەی ئیستەنبوڵ نیشتەوە دوای راوەستانی بۆ ماوەی نزیكەی 10 ساڵ.

ئەم هەنگاوە لێك دەدرێتەوە بە ئاماژەیەك بۆ كرانەوەیەك لە پەیوەندییەكانی نێوان هەردوولایەن بەپێی راپۆرتی رۆژنامەی جیرۆزالیم پۆست.

ئەردۆغان لە چەند لێدوانێكدا رایگەیاندووە كێشەیان لەگەڵ كەسانی سەرەوەی ئیسرائیل هەیە، تا ئێستا فەڵەستین هێڵی سوورە بۆ توركیا مەحاڵە ئەنقەرە بە سیاسەتەكانی ئیسرائیل رازی بێت.

ئەم هەنگاوەی ئەنقەرە دوای ئاشتبوونەوەی ئیمارات و بەحرێن و سودان مەغریب دێت لەگەڵ ئیسرائیل لە ماوەكانی رابردوودا رابردوودا، هاوكات ئاشتبوونەوەی قەتەر لەگەڵ میسر و وڵاتانی دیكەی كەنداو كە دوو گۆڕانكاری گەورەی ناوچەكە بوون.

هاوكات گەورە بەرپرسانی توركیا مەیلی خۆیان بۆ ئاساییكردنەوەی پەیوەندییەكانیان لەگەڵ میسریش نیشان دا دوای ساڵانێك لە گرژی و ئاڵۆزی لەنێوانیاندا.