سەردێر

لە گارە 9 سەربازی سوپای توركیا كوژران

خەڵك-

لە ئۆپەراسیۆنی دوێنێی سوپای توركیا بۆسەر چیای گارە لانی كەم 9 سەربازی توركیا كوژراون.

ئاژانسی فورات نیوز بڵاویكردەوە، ژمارەی سەربازە كوژراو و بریندارەكانی سوپای توركیا لە گارە بە بەردەوامی ڕوو لە هەڵكشانە، چونكە گورزی گەریلا بۆ سەر ئەو هێزانە بەردەوامە.

ئاشكراشیكرد، وەزارەتی بەرگری توركیا تاكو ئێستا هەواڵی كوژرانی ئەفسەرێكی باڵای سوپای توركیا و برینداربوونی ٤ سەربازیان لە شەڕی گارە بڵاوكردوەتەوە.

بەپێی زانیارییەكان، سوپای توركیا ئۆپەراسیۆنی هەڵۆی 2ی بۆسەر ناوچە سنوورییەكانی هەرێمی كوردستان دەستپێكردووە و تاكو ئێستاش شەڕەكە بەردەوامە.

هاوكات ناوەندی راگەیاندن و چاپەمەنی هەپەگە ئاشكرایدەكات، سوپای توركیا لە كاتژمێر 3ی بەرەبەیانی دوێنێوە لە ناوچەی گارە دەستی بە ئۆپراسیۆنێكی بەرفراوان كرد و تاوەكو كاتژمێر 6ی بەرەبەیانی ئەمڕۆ بەردەوام بووە.

ئاشكراشیكرد، سەربازانی سوپای توركیا لە گوندی سیانێ دابەزین و شەڕ روویدا و تاكو ئێستاش بەردەوامی هەیە.

لای خۆشییەوە وەزارەتی بەرگری توركیا لە ڕاگەیەنراوێكدا ئاماژە بۆ ئەوە دەكات، لە ئۆپەراسیۆنی چنگی هەڵۆ-٢ كە لە ناوچەی گارە-ی هەرێمی كوردستان لە دژی گەریلاكانی پەكەكە دەستیپێكردووە، دوو سەربازی سوپای توركیا لە یەكەی كۆماندۆی پیادە لە شەڕ و پێكدادانێكدا كوژراون و چوار سەربازی دیكەش برینداربوون و دەستبەجێ ڕەوانەی نەخۆشخانە كراون.