سەردێر

شەڕ لە گارە بەردەوامە

خەڵك-

شەڕی توركیا و پەكەكە لە گارە بەردەوامە و كوژراو و برینداریش هەیە.

ناوەندی راگەیاندن و چاپەمەنی هەپەگە ئاشكرایدەكات، سوپای توركیا لە كاتژمێر 3ی بەرەبەیانی دوێنێوە لە ناوچەی گارە دەستی بە ئۆپراسیۆنێكی بەرفراوان كرد و تاوەكو كاتژمێر 6ی بەرەبەیانی ئەمڕۆ بەردەوام بووە.

ئاماژە بۆ ئەوەش دەكات، لە ئۆپەراسیۆنەكەدا سنوورەكانی گوندەكانی گوزێ، مەیرۆكێ، سیانێ، چەمشەریتكێ، یەك مالێ و كانی ساركێی سەر بە ناوچەی گارە و دەشتی كافییە و دەشتی نەهلی لەلایەن فڕۆكەی چاودێری و شەڕەوە دەیانجار بۆردومانكران.

ئاشكراشیكرد، سەربازانی سوپای توركیا لە گوندی سیانێ دابەزین و شەڕ روویدا و تاكو ئێستاش بەردەوامی هەیە.

لای خۆشییەوە وەزارەتی بەرگری توركیا لە ڕاگەیەنراوێكدا ئاماژە بۆ ئەوە دەكات، لە ئۆپەراسیۆنی چنگی هەڵۆ-٢ كە لە ناوچەی گارە-ی هەرێمی كوردستان لە دژی گەریلاكانی پەكەكە دەستیپێكردووە، دوو سەربازی سوپای توركیا لە یەكەی كۆماندۆی پیادە لە شەڕ و پێكدادانێكدا كوژراون و چوار سەربازی دیكەش برینداربوون و دەستبەجێ ڕەوانەی نەخۆشخانە كراون.

ئاشكراشیكرد، ئەو پێگانەی لە ناوچەكەدا دەستنیشانكرابوون، لە ئۆپەراسیۆنێكی ئاسمانیدا كراونەتە ئامانج و دەرەنجام گورزێكی توند لە ناوچەكە وەشێندراوە.