سەردێر

لیژنەی تەندروستی: لەڕۆژێكدا 5 هەزار كەس تووشی كۆرۆنا دەبن

خەڵك-
لیژنەی تەندروستی لە پەرلەمانی عیراق، پێیوایە ڕەوشی پەتای كۆرۆنا تائێستاش لەژێر كۆنترۆڵدایە، بەڵام پێشبینی دەكات لە حاڵەتی ناپابەندیی هاووڵاتیان بە ڕێكارە تەندروستییەكان، ژمارەی تووشبوونی ڕۆژانە بەربەرستی 5 هەزار كەس تێبپەڕێنێت.

ئەمڕۆ سێ‌ شەممە، ئاژانسی فەرمی (العراقیە) لە زاری جەواد موسەوی، ئەندامی لیژنەی تەندروستی لە پەرلەمانی عیراق، بڵاویكردەوە”بەشێوەیەكی بەرچاو بەرزبوونەوەی ژمارەی تووشبوان بە ڤایرۆسە كۆرۆنا بەدی دەكرێت، بەڵام تائێستا ڕەوشەكە لەژێر كۆنترۆڵی وەزارەتی تەندروستیدایە و مەترسییەكی گەورە دروست نەبووە”.

موسەوی پێشبینی كرد”ژمارەی تووشبوون بگاتە 5 هەزار لەماوەی چەند ڕۆژی داهاتوو، گەر هاووڵاتیان بەردەوام بن لەسەر پابەندنەبوون بە ڕێكارەكانی خۆپارێزیی كە لەلایەن حكومەتەوە بۆ سنورداركردنی جووڵەی هاووڵاتیان دیاریی كراوە، بە تایبەتیش لە شوێنە قەرەباڵغەكان كە چڕی دانیشتوان تێیاندا زۆرە وەك مۆڵ و بازاڕەكان”.

ئەو ئەندامەی لیژنەی تەندروستی عیراق دەڵێت”لەماوەی هەفتەی داهاتوودا ڕێنمایی نوێ‌ بۆ سنورداركردنی جوڵەی هاووڵاتیان لە هەندێك لە شوێنە مەترسیدارەكاندا دادەنرێت”، بەدووریشی زانی قەدەغەكردنی نیمچە گشتگیر بسەپێنرێتەوە، بەو پێیەی “ژمارەی تووشبوان لەژێر كۆنترۆڵدایە”.