سەردێر

“خەڵك” زیاتر لەدوو ملیار دیناری بەخشیوە

 

سلێمانی – نزار جەزا

ڕێكخراوی خێرخوازی خەڵك كە گروپی كۆمپانیاكانی بەڕێز خاوەندارێتی دەكات، لەماوەی ساڵی ٢٠١٠ تاکو کۆتایی ٢٠٢٠ توانیویەتی زیاتر لە دوو ملیار و ٣٤٣ ملیۆن دینار بە ئەو كەسانە ببەخشێت كە پێویستییان بەهاوكاری هەیە.

ئەحمەد سەلیم سەرۆكی لیژنەی ڕێكخراوی خێرخوازی خەڵك، بە(خەڵك)ی ڕاگەیاند، گروپی كۆمپانیاكانی بەڕێز لەسەرەتای دامەزراندنیەوە هاوكار و پاڵپشتێكی زۆر باشی كەمدەرامەتان و نەخۆشان و خاوەن پێداویستییە تایبەتەكان و خوێندكاران و چین وتوێژەكاندا بووە، بەڵام لەساڵی ٢٠١٤ەوە گروپی كۆمپانیاكانی بەڕێز ڕێكخراوی خێرخوازی خەڵكی دامەزراند، بۆئەوەی ئەم ڕێكخراوە سەرپەرشتی كارەخێرییەكان و هاوكارییەكان بكات.

 

ئاماژەی بەئەوەشدا، بەتەنها لەساڵی ٢٠٢٠دا كە قەیرانی دارایی هەبوو و ڤایرۆسی كۆرۆنا هەبوو و كاركردن ڕاوەستابوو، توانییان ٩٤ ملیۆن دینار خەرجبكەن، ٢١ هەزارو ٤٩ دۆلاری دیكەیان خەجكردووە، لەلایەكی دیكەشەوە پێنج هەزار سەبەتەی خۆراكیان لەماوەی كەرەنتینەدا دابەشكردووە، كە بەهاكەی بەنزیكەیی ٤٠ هەزار دۆلار بوو.

 

ئەوەشی خستەڕوو، ژمارەیەك خێزان هەیە كە مانگانە موچەیان پیدەدەن، موچەكەیان لە ٧٥ هەزار دینارەوە بۆ ٢٥٠ هەزار دینارە، ئەمەش بەپێی پێویستی كەسەكە و بڕیاری لیژنەكە.

 

ئاماژەی بەئەوەشدا، ئەمە جگە لە نۆژەنكردنەوەی قوتابخانە و مزگەوت و بینا حكومییەكان و دروستكردنی نزیكی ٢٠ یەكەی نیشتەجێبوون بۆ كەسوكاری شەهیدان و كەمدەرامەتان و كەسوكاری ئەنفال.

 

وتیشی: ڕۆژانە خەڵكی جۆراوجۆر دێنە لامان نوسراومان بۆ دەهێنن، كە باسی دۆخی خۆیان كردووە، دواتر بەدواداچوون بۆ دۆخی ئەو كەسانە لەڕێگەی لیژنەیەكەوە دەكەین، ئەگەر بۆمان دەركەوت شایستەیە و بودجەی پێویستمان لەبەردەستبوو، هاوكاری دەكەین.

 

ئەوەشی ئاشکراکرد، لەماوەی ساڵی ٢٠١٠ تاکو کۆتایی ٢٠١٩ توانیویانە، ملیارێک و ٨١٥ ملیۆن و ٣٣٩ هەزار دینار، هەروەها نزیکی ٢٩١ هەزار دۆلار ببەخشن.

 

ڕێكخراوی خێرخوازی خەڵك، ڕێكخراوێكی سەربەخۆی قازانج نەویستە سەر بە گروپی كۆمپانیاكانی بەڕێزە، ئامانج و كارو چالاكییەكانی ئەم ڕێكخراوە خزمەتكردنی چینی كەمدەرامەت و هەژاران و خاوەن پێداویستییە تایبەتییەكانە.