سەردێر

ناوخۆی هەرێم ڕێنمایی نوێ بۆ هاوردەكردن و فرۆشتنی ئۆتۆمبێل دەردەكات

وەزارەتی ناوخۆی حكومەتی هەرێمی كوردستان، ڕێنمایی نوێی بۆ ڕێكخستنی كاری كۆمپانیاكانی (هاوردەكردن و گواستنەوە و فرۆشتنی ئۆتۆمبێل) و پێشانگاكان دەردەكات و ڕایدەگەیەنێت: “ئەو كۆمپانیایەی ئۆتۆمبێل هاوردە دەكات، دەبێت لە ماوەی 90 ڕۆژدا ئۆتۆمبێلەكە لەسەر ناوی كۆمپانیاكە تۆمار بكات، ئەگینا ڕۆژانە بڕی 70 هەزار دینار سزای دەچێتە سەر”.


لە ڕێنمایی ژمارە سێی ساڵی 2021دا، وەزارەتی ناوخۆی حكومەتی هەرێمی كوردستان چەندین ڕێنمایی نوێی بۆ هاوردەكردن و گواستنەوە و فرۆشتنی ئۆتۆمبێل دەركردووە و هاتووە، مۆڵەتی كاركردن بە كۆمپانیای (هاوردەكردن یان گواستنەوە یان فرۆشتن) بەم مەرجانەی خوارەوە دەدرێت:

1- پێشكەشكردنی داواكارییەك بە وەزارەتی ناوخۆ/بەڕێوەبەرایەتی گشتیی دیوان/ بەڕێوەبەرایەتی كۆمپانیا ئەمنییەكان و مۆڵەتپێدان لە ڕێگەی بەڕێوەبەرایەتی گشتی تۆماركردنی كۆمپانیاكان.

2- هاوپێچكردنی مۆڵەتی تۆماركردنی كۆمپانیا.

3- پێشكەشكردنی پاكانەی باج.

4- پێشكەشكردنی بەڵگەنامەی بەڕێوەبەری ڕێگەپێدراوی كۆمپانیا.

5- پێشكەشكردنی بەڵگەنامەی بەتاوان نەبوون ( عدم محكومیە ) كە دەبێت بەڕێوەبەری ڕێگەپێدراوی كۆمپانیا هیچ تاوان یان كەتنێكی ئابڕووبەرانەی نەكردبێت بە پشتگیری بەڕێوەبەرایەتی بەڵگەی تاوان.

6- پێشكەشكردنی بەڵگەنامەی پارێزەری كۆمپانیا.

لەبارەی مۆڵەتی كاركردن بە پێشانگاكانی فرۆشتنی ئۆتۆمبێلیش چەند مەرجێك دیاریكراون، لەوانە:

1- پێشكەشكردنی داواكارییەك بە وەزارەتی ناوخۆ/بەڕێوەبەرایەتی گشتیی دیوان/ بەڕێوەبەرایەتی كۆمپانیا ئەمنییەكان و مۆڵەت پێدان لە ڕێگەی بەڕێوەبەرایەتیی هاتووچۆی تایبەتمەند.

2- پێشكەشكردنی بەڵگەنامەكانی خاوەن پێشانگا.

3- پێشكەشكردنی پاكانەی باج.

4- پێشكەشكردنی بەڵگەنامەی بەتاوان نەبوون (عدم محكومیە ) كە دەبێت بەڕێوەبەری ڕێگەپێدراوی كۆمپانیا هیچ تاوان یان كەتنێكی ئابڕووبەرانەی نەكردبێت بە پشتگیری بەڕێوەبەرایەتی بەڵگەی تاوان.

هەر لە ڕێنماییەكانی وەزارەتی ناوخۆدا باس لە گرێبەستی فرۆشتنی ئۆتۆمبێل دەكات و تێیدا هاتووە:

1- گرێبەستێكی ستانداردی فرۆشتنی ئۆتۆمبێل لەلایەن وەزارەتی ناوخۆ ڕێكدەخرێت بە زمانەكانی كوردی و عەرەبی.

2- پێویستە گشت كۆمپانیا و پێشانگاكانی فرۆشتنی ئۆتۆمبێل لە كاتی فرۆشتنی ئۆتۆمبێل گرێبەستی بڕگەی (١)ی سەرەوە بەكاربهێنێت بۆ ئۆتۆمبێلی ژمارە كاتی یان تۆماركراو.

3- هیچ گرێبەستێكی تر جگە لەوەی لە بڕگە (١)ی سەرەوە ئاماژەی پێدراوە لە بەڕێوەبەرایەتییەكانی هاتووچۆ كاری پێ ناكرێت لە كاتی فرۆشتنی ئۆتۆمبێل بۆ یەكەمجار یان فرۆشتنی ئۆتۆمبێلی تۆماركراو.

لە ڕێنماییەكەی وەزارەتی ناوخۆدا چەندین مەرج بۆ نووسینگەی كۆمپانیا یاخود پێشانگەی فرۆشتنی ئۆتۆمبێل دیاریكراوە، كە پێویستە ڕووبەری پێشانگە لە (500م2) كەمتر نەبێت، كە (100م2) بۆ نووسینگەی كۆمپانیا و (400م2)یش بۆ نمایشی ئۆتۆمبێل تەرخان بكرێت.

هەروەها كۆمپانیا بەشێكی تایبەت بۆ ئەرشیفی بەڵگەی ئۆتۆمبێلە فرۆشراوەكان ئامادە بكات.

خەڵك – بەشی هەواڵ



هەلبژاردە

گرنگترینەکان