سەردێر

“لەناو یەكگرتوو باڵ و تەكەتول نییە، بەڵام ڕای جیاوازمان هەیە”

 

خەڵك-
كادیرێكی پێشكەوتووی یەكگرتووی ئیسلامی كوردستان ڕایدەگەیەنێت، دەبێت لە هەوڵی ئەوەدابین دەنگی شەقام و خەڵكی ناڕازی و مافی زەوتكراوی خەڵكی لە ئەولەویەتی كارەكانمان بێت.

ئەمڕۆ ساڵیادی ڕاگەیاندنی یەكگرتووی ئیسلامی كوردستانە، یەكگرتوو وەك حزبێكی ئیسلامی میانڕەو لە 6-2-1994 خۆی ڕاگەیاندووە و جگە لە خولێكی هەڵبژاردن سەرجەم خولەكانی دیكە سەڵاحەدین بەهائەدین ئەمینداری حزبەكە بووە، هەرچەندە لە 10 ساڵی ڕابردوودا بۆچوون و باڵی جیاواز لەنێو ئەو حزبە سەریهەڵداوە، بەڵام نەیانتوانیوە بگەنە هەڕەمی دەسەڵات و كەسی یەكەمی حزب بۆ خۆیان دەست بخەن، لە ئێستاشدا وەك خۆیان ئاماژەی بۆ دەكەن وەك یەك تیم كار بۆ پێشخستنی حزبەكەیان دەكەن.

ئەنوەر عەرەب، كادیری پێشكەوتووی یەكگرتووی ئیسلامی كوردستان بە (خەڵك)ی ڕاگەیاند، هەموو پارتێكی سیاسی لەچوارچێوەی ستراتیژی خۆی كاتێك خۆی ڕادەگەیەنێت بەپێی ئەو لەمپەڕانەی دێتە بەردەمی هەوڵ دەدات خۆی دەرباز بكات و كارەكانی خۆی جێبەجێ بكات، ئەوەی مایەی خۆشحاڵییە یەكگرتوو توانیویەتی لەسەر بنەما نەگۆڕەكانی خۆی، كە پڕۆسەی ئیسلامی و چاكسازی و پاكسازی و دژە گەندەڵی و پەروەدەكردنی گەنجانە، كە بە شاهیدی خەڵك لەو بابەتەدا پێشەنگ بووە، جێگیر بێت.

وتیشی، “لە ئەدای حزبەكە و بەپێی هەڵوێستە سیاسییەكانمان تا ئەندازەیەكی باش ڕازین، ئەوەشی دەمێنێتەوە خوێندنەوەی سیاسی دیكەی هەیە، كە توانیومانە ئاڕاستەی سیاسی خۆمان بەردەوامی پێبدەین”.

ئاشكراشیكرد، دەبێت لە هەوڵی ئەوەدابین دەنگی شەقام و خەڵكی ناڕازی و مافی زەوتكراوی خەڵكی لە ئەولەویەتی كارەكانمان بێت و هەمیشەش هەوڵ و پیشەنگیمان هەبێت بۆی، پێویستە خەڵكیش لەسەر ئەو شێوازە كاركردنە ڕابهێنرێت، كە سارد نەبێت و متمانەی بە ڕێكارە مەدەنییەكان و پڕۆسەی چاكسازی لەنێو حكومەت هەبێت، چونكە دەسەڵات لە هەوڵی ناشرینكردنی خەباتی مەدەنی و ئەو ڕێكارانەیە، كە ئۆپۆزسیۆن دەیگرێتەبەر.

ڕوونیشیكردەوە، دەسەڵات پێی خۆشە لەكاتی داواكاری و خۆپیشاندانەكان توندوتیژی لێبكەوێتەوە، بۆ ئەوەی بتوانێت بەربەست بێت لە بەردەم ئەو شێوازە ناڕازییە، بینیشمان لە خۆپیشاندان و گردبوونەوەكاندا هەر جۆرە توندوتیژییەك ڕوویدابێت بە قازانجی دەسەڵات بووە و خۆپیشاندانەكان سەركوت كراون.

سەبارەت بە لابردنی پاشگری ئیسلامی، كە پیشتر ناكۆكی لەسەر دروست بووبوو، ئەنوەر عەرەب ڕایگەیاند، پڕۆگرامی خۆمان هەیە، كە نەهجێكی ئیسلامی میانڕەوی ئیسڵاحییە، ئەوەش جێگیرە و گۆڕانی بەسەردا نایەت، بەڵام چۆنیتی جێبەجێكردنی ئەو پڕۆگرامە بەپێی بارودۆخ و ئەو تایبەتمەندییە سیاسییەی لە هەرێم هاتۆتە پێش و دێتە پێش، شێوازی مامەڵەی سیاسی و هاوپەیمانی سیاسی دەكرێت دەربڕینەكانمان گۆڕانكاری بەسەردا بێت نەك لە ناوەڕۆكی ئەو شێوازەی هەڵمانگرتووە.

جەختی لەوەش كردەوە، لەنێو یەكگرتوو هیچ باڵێكی جیاوازی تێدا نییە، ڕای جیاوازمان هەیە، دەستاودەستكردنی دەسەڵات هەیە، بەڵام بەهیچ شێوازێك تەكەتول نییە، بۆچوونی لابردنی پاشگری ئیسلامیش شاراوە نییە بەشێوەیەك لە شێوەكان بۆ لێكدانەوە بۆ ئەدای و فراوانكردنی كاری یەكگرتوو بووە و وەك پێویست دەنگی نەهێناوە و ئەو جۆرە بابەتانە كاڵبوونەتەوە، ئومێد دەكەین لە داهاتوودا بە كۆدەنگی و یەكدەنگیەكی زیاتر خەباتی یەگرتوو زیاتر درێژە پێبدەین.