سەردێر

“یەكگرتوو، ئەوەی پێویستی خەڵك و واقیعەكە بوو كردی”

خەڵك-

دامەزرێنەرێكی یەكگرتووی ئیسلامی كوردستان ڕایدەگەیەنێت، یەكگرتووویەكی نوێ بووەوە، هەڵساوە، زیندوو، پێداگر، گەشەكردوو، دەتوانێت خزمەتێكی گەورە بەواقیعی ئێستا و داهاتووی گەلەكەمان بكات و ببێتە هەوێنی پڕۆژەیەكی نیشتیمانی و ڕوحی و ئەخلاقیی گەورەتر لە خۆی.

ئەبوبەكر كاروانی، یەكێك لە دامەزرێنەرانی یەكگرتووی ئیسلامی كوردستان لە ساڵیادی دامەزراندنی حزبەكەی كە لە 6-2-1994 ڕاگەیەنرا لە نووسینێكدا ئاماژە بۆ ئەوە دەكات، هیوادارین، سەرجەم یەكگرتووەكان بە قەناعەتێكی قوڵ و ئیرادەیەكی بەهێزەوە، لە ناوخۆ و دەرەوەی یەكگرتوودا، بۆ چەسپاندن و بەرزڕاگرتنی ئەم بەها گەورە و گەردونیانە تێبكۆشن و لەم پێناوەشدا پێداگربن.

دەقی نووسینەكە:

بۆ یەكگرتووەكان
بەناوی خوای بەخشندەی میهرەبان
بە بۆنەی ٢/٦ ساڵڕۆژی ڕاگەیاندنی یەكگرتووی ئیسلامی كوردستانەوە، پیرۆزبایی لە سەرجەم ئەندام وكادر و خوشك و برایانی بە ئەمەك بەرامبەر دروشمەكانی (دادپەروەری، ئازادی و برایەتی) دەكەین. هیوادارین، سەرجەم یەكگرتووەكان بە قەناعەتێكی قوڵ و ئیرادەیەكی بەهێزەوە، لە ناوخۆو دەرەوەی یەكگرتوودا، بۆ چەسپاندن و بەرزڕاگرتنی ئەم بەها گەورەو گەردونیانە تێبكۆشن و لەم پێناوەشدا پێداگربن. وە ساڵی داهاتووی یەكگرتوو دەرفەتێكی راستەقینە بێت بۆ بە خۆدا چوونەوەو زاڵبوون بەسەر كێشەو بەربەستەكاندا.
دیارە یەكگرتوو لە كاتی سەرهەڵدانیدا، ئیزافەیەكی ئیسلامی و سیاسی و روحی و نیشتیمانی گرنگ بوو، بۆ سەر گۆرەپانەكە، لەو قۆناغەدا توانی تا ڕاددەییەكی بەرچاو ببێتە سەرچاوەی ناسنامەو ئومێد و متمانە بە دوواڕۆژ نەدۆڕان، بۆ بەشێكی بەرچاو لە نەوە نوێكانی ئەو كاتەو كەمكردنەوەی ئازار و نەهامەتی گەلەكەمان، كە شەڕی ناوخۆو ئابڵۆقەی چەند سەرەی دەرەكی، بۆی دروست كردبوو تەنگی پێهەڵچنیبوو.
دیدێ بوو، بانگەشەی بەیەكەوە ژیانی ئاشتیخوازانەو بە یەكەوە كۆكردنەوەیەكی بە یەكتر تەبای، ناسنامەی ئیسلامی و نیشتـمانی و دیموكراسی دەكرد، كە بۆ ئەو ڕۆژگارە گرنگی و بایەخی خۆی هەبوو، هەر بۆیەش لە نەوەتەكاندا گەشەیەكی چۆنایەتی گەورەی كرد و بوبووە جێی سڵلێكردنەوەی هەندێك و سەرسورمانی چاودێرانی دۆخی هەرێم. ئەمەش لەوەوە سەرچاوەی گرتبوو، ئەوەی دەكرد كە پێویستی خەڵك و واقیعەكە بوو، وە هێشتا لە قۆناغی پەخشكردنەوەی موژدەكانی خۆیدابوو.
لە چوارچێوەی كاری هاوبەشی ئۆپۆزیسۆنیش، جەماوەرەكەی دەرفەتێكی گرنگی پێداو دەنگەكانی لە ٢٥٠ هەزار دەنگ نزیكبووەوە. بەڵام بەداخەوە، ئەم دۆخە تاسەر درێژەی نەكێشاو لەبەر چەندین هۆكاری خودی و بابەتی، قۆناغی پاشەكشەی دەستی پێكرد و گەیشتە ئەو دۆخەی ئێستا دەیبینن. ئەوەش لە دڵسۆزو كادرو بەرپرسانی دەخوازێت، ئازایانەو بەرپرسانە دەست بخەنەسەر هۆكارەكانی ئەم پاشەكشە زۆرە، بپرسن لاوازی بەرێوەبردنی حیزبەكە لە كوێ و لە چیدایە؟ هۆكاری لاوازبوونی توانای لە خۆگرتنی و بە تایبەتیش بۆ بەشە زیندووەكەی بۆ سنوری پاڵپێوەنانی هەندێك بۆ دەرەوەی سنورەكانی چیە و چۆن لێی تێبگەین؟ پەیوەندی فۆرمی كاركردنی بە وەستاویی گەشەكردنیەوە چیە؟ چۆن لەگەڵ جەماوەرەكەی ئاشت بێتەوەو ببێتەوە جێگەی ئومێدیان؟ چۆنا توانای تێگەیشتن و دوواندنی نەوە نوێكانی زیاتر بێت، كە لە دنیایەكی جیاوازدا چاویان كردۆتەوە؟ چۆن لەبەر چاوی رای گشتی ئەو بەشە لە وێنەی شێواوە راستبكرێتەوە؟
لە پاڵ ئەم شتانەو چەندین مەسەلەی تردا، نەخشەو پلانێكی هەبێت، بۆ وەگەڕخستنی ئەو هەموو تواناو كادرەی لەناو ڕیزەكانیدا پەنگی خواردووەتەوەو وەك ئەوەی پێویستە تواناكانیان ناچێتە خزمەت چاكسازی و دووبارە بیناكردنەوەی سیستم و پەرەدانێكی زۆرتر بە فەرهەنگی عەدالەتخوازی و نیشتیمان پەروەریەكی پاك و خاوێن و خزمەتێكی روحیەوە!چونكە وڵاتەكەمان، تا خوا حەزكات پێویستی بە وەگەڕخستنی سەرجەم توانا دڵسۆز و چاكە خوازەكان هەیە، هەر بۆیە، راست نیە، چوارچێوە حیزبییەكان، لە ئەم وەگەرخستنە پێویستە ڕێگربن.
لە كۆتایدا دەڵێین: یەكگرتووویەكی نوێ بووەوە، هەڵساوە، زیندوو، پێداگر، گەشەكردوو، دەتوانێت خزمەتێكی گەورە بەواقیعی ئێستا و داهاتووی گەلەكەمان بكات. ببێتە هەوێنی پڕۆژەیەكی نیشتیمانی و روحی و ئەخلاقیی گەورەتر لە خۆی. ڕێگای ئەمەش دووبارە خۆبینا كردن و پێناسەكردنەوەیە. بەهیوای بەدیهاتنی ئەو چاوەروانی و ئامانجە. دووبارە پیرۆزە. گەلەكەمان پارێزراو و تەوژمی نیشتیمانی ئیسڵاحخواز سەركەوتوو.
براتان ئەبوبەكر عەلی كاروانی
ئەندامی دەستەی دامەزرێنەری یەكگرتوو.