مەزڵوم كۆبانێ: هەسەدە ھیچ پەیوەندییەكی بە پەكەكەوە نییە

سەردێر

خەڵك-

فەرماندەی گشتی ھێزەكانی سوریای دیموكرات (ھەسەدە) ڕایدەگەیەنێت، دەیانەوێت پەیوەندییەكانیان لەگەڵ ئیدارەی نوێی ئەمریكا بە سەرۆكایەتی بایدن بەھێز بكەن و دەشڵێت: “هەسەدە ھیچ پەیوەندییەكی بە پەكەكەوە نییە”.

مەزڵوم كۆبانێ، فەرماندەی گشتی هەسەدە بە ڕۆژنامەی (شەرقولئەوسەت)ی ڕایگەیاندووە، دڵخۆشن بە ھاتنی جۆ بایدن و دەیانەوێت پەیوەندییەكی ھاوبەش و ھاوسەنگ دروست بكەن لەگەڵ ئیدارەی نوێی ئەمریكا و ھیواداریشن جۆ بایدن ھەڵەكانی ترەمپ لە هەڵكردنی گڵۆپی سەوز بۆ داگیركردنی بەشێكی ڕۆژئاوای كوردستان ڕاست بكاتەوە، كە زیانی زۆری بە كوردان گەیاند.

ڕاشیگەیاندووە، هیوادارن ئیدارەی بایدن ستراتیجیەتێكی نوێ‌ پەیڕەو بكات بۆ پێدانەوەی ڕۆڵی كاریگەری ئەمریكا لە ناوچەكە و دانانی چارەسەری كۆتایی بۆ دۆخی سوریا.

مەزڵوم كۆبانێ‌ وتوشیەتی، “داگیركارییەكانی توركیا لە ناوچەكانی سەرێكانی و گرێ سپی بۆتە هۆی زیندووكردنەوەی داعش بەهۆی ئەو هاوكاریانەی لەلایەن هێزە داگیركەرەكانی توركییاوە دەكرێن، كە دەیانەوێت پاوانخوازی خۆیان بگەیەننە ناوچەكانی ڕۆژهەڵاتی فوڕات.

باسی لەوەشكردووە، هەسەدە ھیچ پەیوەندییەكی بە (پەكەكە)وە نییە و سەربەخۆن لە بڕیاردا و ستراتیجیەتێكی ڕوونی هەیە لە سوریا، كە تەنها گۆڕەپانی چالاكییەكانە، بەڵام خۆمان بنیاتناوە لەسەر بۆچوون و پڕۆژەی گەلی دیموكراتی، كە ئۆجەلان خستویەتیەڕوو .

سەبارەت بە گفتوگۆكان لەگەڵ حكومەتی بەشار ئەسەد، كۆبانێ‌ وتی، “گفتوگۆكان لەلایەنی سەربازییەوە، كە لایەنی ڕوسی گرنتی كردووە نەگوازراوەتەوە بۆ ڕێككەوتنی سیاسی، چونكە بۆچوونی ڕژێم ئەوەیە دەیانەوێت وڵات بگەڕێننەوە بۆ پێش 2011 لەڕێگەی نانەوەی ئاژاوە و دووبەرەكی لەنێوان عەرەب و كورد، بەڵام ئێمە بەردەوام هەوڵ دەدەین بۆ كردنەوەی دەرگای گفتوگۆ لەسەر بابەتە چارەنووسسازەكان”.