سەردێر

فەرمانگەی كارتی نیشتمانی سورداش كرایەوە

خەڵك-
ئەمڕۆ فەرمانگەی كارتی نیشتمانی سورداش كرایەوە و بەڕێوەبەری كارتی نیشتمانی پارێزگای سلێمانی داوا لە هاووڵاتیان دەكات تەنها بۆ هاوسەرگیری و جیابوونەوە و منداڵی تازەلەدایكبوو و مردن سەردانی فەرمانگەكە بكەن.

مقەدەم شێركۆ ئەحمەد بەڕێوەبەری كارتی نیشتمانی پارێزگای سلێمانی بۆ (خەڵك) ڕایگەیاند، ئەمڕۆ پێنج شەممە 4-2-2021 فەرمانگەی كارتی نیشتمانی سورداش لە ناحیەی سورداش بە ڕووی هاووڵاتیاندا كرایەوە و ڕێكارەكان بەردەوامن بۆ كردنەوەی چەند فەرمانگەیەكی دیكە لەسنووری پارێزگای سلێمانی.

ڕاشیگەیاند، لە ڕۆژی یەك شەممەی داهاتووەوە هاووڵاتیانی ئەو سنوورە دەتوانن سەردانی فەرمانگەكە بكەن بەمەبەستی ڕایی كردنی مامەڵەكانیان.

وتیشی، ” داواكارین لە هاووڵاتیان لە ئێستادا بۆ دەرهێنانی كارتی نیشتمانی سەردانی فەرمانگەكانی كارتی نیشتمانی نەكەن، بەڵكو تەنها بۆ چەند مەبەستێكی دیاریكراو مامەڵەی هاووڵاتیان ڕایی دەكرێت”.

سەبارەت بەو مامەڵانەی ڕایی دەكرێن لە ئێستادا، مقەدەم شێركۆ وتی، “لە ئێستادا تەنها كاروبارەكانی تایبەت بە مامەڵەی ھاوسەرگیری، مامەڵەی جیابوونەوە، مامەڵەی منداڵی تازە لەدایكبوو، كە دەبێت منداڵەكە تەمەنی (٣ مانگی) تەواو كردبێت، مامەڵەی مردن، مامەڵەی تێكچوون یان ونبوونی پێناسی باری شارستانی و كارتی نیشتیمانی، مامەڵەی (صورە قیدی ورقی) واتا تۆماری ٥٧، مامەڵەی (صورە قیدی ئەلكترۆنی) بۆ ئەو كەسانەی خاوەنی كارتی نیشتیمانین”.



هەلبژاردە

گرنگترینەکان