سەردێر

داوای دامەزراندنی هەمیشەیی دەكەن

داواش دەكەن تا دەكرێنە هەمیشەیی هیچ جۆرە لێبڕینێكی مووچە نەیانگرێتەوە

خەڵك-
ژمارەیەك لە فەرمانبەرانی گرێبەست بەیاننامەیەكیان بڵاو كردووەتەوەو داوا دەكەن دامەزراندنیان بكرێت بە هەمیشەیی و لە پڕۆژە یاسای 2021 ی بودجەی هەرێمدا جێبكرێتەوە.

لە بەیاننامەكەدا كە ئاراستەی پەرلەمان و حكومەتی هەرێمیان كردووە فەرمانبەرانی گرێبەست دەڵێن، لەسیستەمی پاشەكەوتی مووچە زەرەرمەندی یەكەم بوین و % 21 ی موچەكەمان دەبڕدرێت و بەبێ‌ هیچ ئیمتیازاتێك حسابی فەرمانبەرێكمان بۆ دەكرێت كە مووچەكەی 1 ملیۆن دینارە لە كاتێكدا مووچەی تەواوەتیمان لەنێوان 350 بۆ 400 هەزار دینارە.

ئەو فەرمانبەرانە، داوادەكەن لەپڕۆژە یاسای بودجەی گشتی 2021 ی هەرێمی كوردستان بەر لە ڕەوانەكردنی بۆ پەرلەمان بەهەمیشەیی بوونیان لە بڕگەیەكدا جێبكرێتەوەو داواش
لە فراكسیۆنەكانی پەرلەمان دەكەن پشتیوانی داواكارییەكانیان بن لەكاتی تێپەڕاندنی پڕۆژە یاساكە.
داواش دەكەن تا دەكرێنە هەمیشەیی هیچ جۆرە لێبڕینێكی مووچە نەیانگرێتەوە.
ئاماژە بەوەش دەكەن، زۆرینەی فەرمانبەرانی گرێبەست نەك ماوەی یاساییمان تەواو كردووە، بەڵكو ساڵانی خزمەتمان لە نێوان 4-15 ساڵدایە و تا ئێستا نەكراوینەتە هەمیشەیی.

No description available.