سەردێر

دوو تەقینەوە لە سەرێكانێ‌ ڕویاندا

خەڵك- بەشی هەواڵ
دوو تەقینەوەی یەك لەدوایەك لە شاری سەرێكانێ‌ كە لەژێردەستی سوپای توركیا و گروپە سورییەكانی سەر بە وڵاتەكەدایە، ڕویاندا.

دوانیوەڕۆی ئەمڕۆ چوار شەممە، دوو بۆمبی چێنراو لە نزیك فولكەی بەرید لە ناوەڕاستی شاری سەرێكانێ‌ لە ڕۆژائاوی كوردستان ڕویدا و بەو هۆیەوە سێ‌ كەس برینداربوون.

سەرێكانێ‌ و ناوچە كوردستانییەكانی ڕۆژائاوا كە لەژێر دەستی سوپای توركیا و گروپە چەكدارە ئۆپۆزسیۆنەكانی سەر بە وڵاتەكەدان، لە ڕەوشێكی ئەمنی ناسەقامگیردان و ناوبەناو تەقینەوە و هێرشی چەكداری بەخۆوە دەبینن.

لەم چەند ڕۆژەی دواییدا، چەندان تەقینەوە لە ناوچەكانی ڕۆئاوای كوردستان كە لەژێر دەستی سوپای توركیادان ڕویاندا، لەوانەش تەقینەوەیەك لە 26ی كانوونی دووەمی ڕابردوو لە شاری گرێ سپی كە بووە مایەی كوژرانی سێ‌ كەس و برینداربوونی 7ی تر، لەگەڵ دوو تەقینەوە لە شارەكانی عەفرین و ئەعزاو و باب لەماوەی هەفتەی ڕابردوودا كە كوژرانی زیاتر لە 15 كەس و برینداربوونی زیاتر لە 40 كەسیان لێكەوتەوە.