سەردێر

كچێكی ڕفێنراو دۆزرایەوە

خەڵك-

بەڕێوەبەرایەتی پۆلیسی پارێزگای سلێمانی ڕایدەگەیەنێت، لەسەر دۆسیەی ڕفاندنی كچێك و بێهۆشكردنی تۆمەتبارێك دەستگیركرا.
بەڕێوەبەرایەتی پۆلیسی پارێزگای سلێمانی لە ڕاگەیەنراوێكدا ئاماژە بۆ ئەوە دەكات، دوای ئەوەی هاووڵاتییەك سكاڵای تۆماركرد كە كچەكەی بەمەبەستی كڕینی پێداویستی لەماڵ چۆتە دەرەوەو نەگەڕاوەتەوە، بەڕێوەبەری پۆلیسی پارێزگای سلێمانی سەرجەم بنكەكانی سنووری پۆلیسی سلێمانی ڕاسپارد كە بەدواداچوونی خێرا بكەن بۆ دۆزینەوەو دەستگیركردنی تۆمەتبار .

ئاشكراشیكرد، دوای وەرگرتنی بڕیاری دادوەر پۆلیس لێكۆڵینەوەكانی دەستپێكردو گومان خرایەسەر تۆمەتبارێك و توانرا هەمان ڕۆژ و لەلایەن بنكەی پۆلیسی ڕزگارییەوە تۆمەتبار دەستگیربكرێت كە بە ئۆتۆمبیلێكی جۆری تۆیۆتا كامری كچەكەی هەڵگرتووەو دوای بێهۆشكردنی لە شوێنێك فڕێیداوە.

ڕوونیشیكردەوە، لە ئێستادا تۆمەتبار (ش، أ ، ع) لەدایكبووی 1991 بەبڕیاری دادوەرو بەپێی ماددەی 421 لەیاسای سزادانی عیراقی ڕاگیراوەو دەستیش گیراوە بەسەر ئۆتۆمبێلەكەیدا و كچەكەش پاش دۆزینەوەی لەلایەن مەفرەزەكانی پۆلیسەوە گەیەنراوەتە نەخۆشخانەوەو لەئێستادا لە ژێر چاودێریدایەو چارەسەری پزیشكی وەردەگرێت .