سەردێر

مامۆستایانی ئاینی ڕۆڵی بەرچاویان هەیە لە پاراستنی یەكڕیزیی و لێبوردەیی و پێكەوەژیاندا

خەڵك-
هاوسەرۆكی یەكێتیی نیشتیمانیی كوردستان پێشوازی لە مامۆستا سەرۆكی لقی سلێمانی یەكێتیی زانایانی ئایینیی ئیسلامی كوردستان و وەفدێكی هاوڕێی كرد و ڕایدەگەیەنێت، مامۆستایانی ئایینی ڕۆڵی بەرچاویان هەیە لە پاراستنی یەكڕیزیی و لێبوردەیی و پێكەوەژیاندا.

لاهور شێخ جەنگی ، هاوسەرۆكی یەكێتیی نیشتیمانیی كوردستان ئەمڕۆ دووشەممە ١ـی٢ـی 2021 پێشوازی كرد لە مامۆستا مەلا نەجمەدین پێنجوێنی، سەرۆكی لقی سلێمانی یەكێتیی زانایانی ئایینیی ئیسلامی كوردستان و وەفدێكی هاوڕێی و لە دیدارێكدا گفتوگۆ كرا دەربارەی بارودۆخی گشتی و پێكەوەژیانی ئایینی و كاری پێكەوەیی و ڕێوشوێنەكانی پەرەپێدان و پتەوكردنی پەیوەندییەكانی نێوان هەردوولا.

لاهور شێخ جەنگی ئاماژەی بۆ پێگە و ڕۆڵی گرنكی مامۆستایانی ئایینی كرد لە هەموو قۆناغ و سەردەمەكاندا و ڕایگەیاند، مامۆستایانی ئایینی هەمیشە ڕۆڵی دیار و بەرچاویان هەبووە لە خزمەتكردنی گەلەكەماندا و بەرگرییان لە گەل و بەها نیشتیمانییەكان و ئایینی پیرۆزی ئیسلام كردووە و ڕۆڵی بەرچاویان هەیە لە پاراستنی یەكڕیزیی و لێبوردەیی و پێكەوەژیاندا و بەردەوامیش مامۆستایانی ئایینی جێگە و پێگەیەكی گەورەیان هەیە لە نێو كۆمەڵگەی كوردەواریدا.

لە دیدارەكەدا گفتوگۆ كرا دەربارەی بارودۆخی ئێستا و لە نێویاندا پرسی لامەركەزیی لە سەرجەم پارێزگاكانی هەرێمی كوردستان، كە بووەتە خواستێكی گشتی، لەگەڵ پرسی كێشە هەڵپەسێردراوەكانی نێوان حكومەتی هەرێم و حكومەتی فیدراڵی و لەو ڕووەوە لاهور شێخ جەنگی دووپاتیكردەوە، كە كێشەكان پێویستییان بە ڕێوشوێن و چارەسەری ورد و ژیرانەیە، هەوڵەكانیش دەبێت بەو ئاقارە بەردەوام بن و هەمووان پشتیوانیی ڕێككەوتن بكەین لە پێناو چارەسەركردنی كێشەكان و دابینكردنی مووچەی مووچەخۆران و ژیانێكی شایستە بۆ هاووڵاتییان.

هاوسەرۆكی یەكێتی باسی لەوەشكردووە، كە وەك سەرۆكایەتی یەكێتی پشتیوانیی بۆ كار و پڕۆژەكانی زانایانی ئایینی و لقی سلێمانی یەكێتیی زانایان دووپات دەكەینەوە و داوا دەكەن مامۆستایانی ئایینی بەردەوام بن لەو ڕۆڵە گرنگ و پێشڕەوەی كە لە كۆمەڵگەدا دەیبینن لە ڕێنماییكردن و هاندانی خەڵك بۆ كاری چاكە و باش پەروەردەكردنی كۆمەڵگە لە ڕووەكانی كۆمەڵایەتی، ڕوناكبیری، سیاسی و نیشتیمانپەروەرییەوە، كە ئەوەش بەشدارییەكی گەورەیە لە پێشكەوتن و پەرەسەندنی كۆمەڵگەدا.

دواتر سەرۆكی لقی سلێمانی یەكێتییی زانایانی ئایینیی ئیسلامی كوردستان و وەفدە هاوڕێكەی سوپاسی هاوسەرۆكی یەكێتیی نیشتیمانیی كوردستانیان كرد بۆ ئەو پەیوەندییە بەهێز و بایەخدانە گرنگەی هەیەتی بۆ مامۆستایانی ئایینی و ئەو هەوڵ و هەنگاوانەی كە دەیانخاتەگەڕ لە پێناو خۆشگوزەرانی بۆ میللەتەكەی و هیوای بەردەوامی و سەركەوتنیان بۆ خواست.

No description available.