سەردێر

قڕكردنی ژمارەیەك سەگ كاردانەوەی لێدەكەوێتەوە

خەڵك-

قڕكردنی ژمارەیەكی زۆر سەگ لە ناحیەی سنونێی سنووری قەزای شەنگال لەڕێگەی ژەهرخواردكرنەوە بەبیانووی بێزار كردنی هاوڵاتیان كاردانەوەی لێكەوتەوە.

مەعروف مەجید سەرۆكی ڕێكخراوی ئایندە بۆ پاراستنی ژینگە بە (خەڵك) ی ڕاگەیاند، ڕاستە ڕەنگە ئەو سەگانە بوبێتنە مایەی بێزاركردنی هاوڵاتیان بەڵام دەكرا بەڕێگای دیكەو تەندروستانە مامەڵەیان لەگەڵ بكرێت نەك بەو ڕێگا نامرۆڤانەو ناشارستانییە لەناو ببرێن.

وتیشی،چەند جارێك لە لیژنەی فتوای هەرێم و وەزارەتی كشتوكاڵ و دەستەی ژینگە داوامان كردووە ئەو ئاژەڵانە كۆ بكرێنەوەو لە شوێنێك سەرپەرشتیان بكرێت یاخود نەهێڵرێت زاوزێ‌ ببن ، نەك بەو جۆرە نامرۆڤانە قڕ بكرێن.

ئاماژەی بەوەشكرد، بەداخەوە ئاژەڵی بێخاوەن ساڵ لەدوای ساڵ لە زیاد بوندایەو زیاتر لە گوندەكاندا دەبینرێن ئەوەش بەهۆی ئەوەی كۆچی پێچەوانە هەیەو زۆربەی دانیشتوانی گوندەكان دێنە ناو شارەكان و ئاژەڵەكان بەبێ‌ خاوەن بەجێدەهێڵن.

وتیشی زۆر ئاژەڵی دیكەش هەیە كە بەسەرماو گەرما بێلانەو بێخاوەنن نەریتێكی زۆر ناشرین لەناو ئێمەدابوونی هەیە هەر لەمنداڵیەوە تاكەكان وا پەروەردە دەكرێن ئازاری ئاژەڵان بدەن بەمناڵی پێیان دەوترێت بەردێك بگرە ئاژەڵەكە یان منداڵان بە ئاژەڵ دەترسێنن كە ئەوە لێكەوتەی خراپی دەبێت لە گەورەبوونی تاكەكاندا .

دەشڵێت، ئێمە بۆ لەكاتی پێویستیا زۆربەی ئاژەڵەكان بەكار دەهێنین و پێویستمانە و لەكاتی دیكە هەوڵی ئازار دان و لەناو بردنیان دەدەین و سۆز و بەزەیمان نامێنێت؟

مەعروف مەجید وتیشی، پێویستە مامۆستایانی ئاینی لە وتارەكانیاندا ئەم بابەتە فەرامۆش نەكەن و باسی پاراستنی مافی ئاژەڵان بكەن لە ئایندا یاخود بەرپرسانی پەروەردە ئەم بابەتە لە خوێندنگەو شوێنە فێركاریەكاندا جێبكەنەوە و كەناڵەكانی ڕاگەیاندیش زیاتر خەڵك هۆشیار بكەنەوە و ئەركی ڕاستەقینەیان ئەنجام بدەن.