سەردێر

پێشمەرگە، سەنگەر و بنكەی نوێ دروست دەكات

خەڵك-بەشی هەواڵ

فەرماندەیەكی هێزی پێشمەرگە هەموو ئەو دەنگۆیانەی ڕەتكردەوە كە ئاڵۆزی لەنێوان هێزی پێشمەرگە و سوپای عێراقی دروست بووبێت.

ئاژانسی (RT) بڵاویكردەوە، سیروان بارزانی بەرپرسی هێزی پێشمەرگە لە میحوەری گوێر-مەخموور ڕایگەیاند، ڕوودانی هەر جۆرە ئاڵۆزییەك لە نێوان هێزەكای پێشمەرگە و سوپای عێراق دوورن لە ڕاستییەوە، بەڵكو هێزەكانی پێشمەرگە بەپێی كەشوهەوای ساردی زستان، هەوڵی دروستكردنی سەنگەر و بنكەی نوێیان داوە.

وتیشی”جموجووڵەكانی هێزی پێشمەرگە لە ناوچەكە تایبەتە بە جێگیركردنەوەی هێزەكانی پێشمەرگەیە و پەیوەندیەكی باشیشمان لەگەڵ سوپای عێراق هەیە”.

ئەمەش لەكاتێكدایە، لە ناوچە كێشە لەسەرەكان جموجوڵەكانی چەكدارەكانی داعش ناوە ناوە ئەنجام دەدرێن، بەڵام هیچ ڕێكەوتنێك نییە بۆ پڕكردنەوەی ئەو بۆشاییە ئەمنییە.

پێشتر مەحمود محەمەد جێگیری بەرپرسی مەڵبەندی حەمرینی یەكێتی بە (خەڵك)ی ڕاگەیاند، بوونی داعش لەو ناوچانە جگە لەوەی بەهۆی هێرشەكانیانەوە هاووڵاتیانی سڤیل دەبنە قوربانی، بەهۆی زۆری دانانی بۆمب لەو ناوچانە وایكردووە گەورەترین لەوەڕگای ئاژەڵانیش لەدەست بدەین و ئەمەش زیانێكی زۆری ماددیە بۆ دانیشتوانی ناوچەكە.