سەردێر

پۆلیسی سلێمانی: تەقە لە بارەگای پارتی نەكراوە

خەڵك-
میدیاكانی نزیك لە پارتی ڕایدەگەیەنن، سەرلەبەیانی ئەمڕۆ شەممە، لەلایەن چەند كەسێكی نەناسراوەوە تەقە لە بارەگای ناوچەی 1ی پارتی دیموكراتی كوردستان لە سلێمانی كراوە و وتەبێژی پۆلیسی سلێمانی-ش دەڵێت: “هیچ حاڵەتێكی لەو جۆرە ڕوووینەداوە”.

میدیاكانی نزیك لە پارتی بڵاویانكردەوە، “كاتژمێر 6:13 خولەكی سەرلەبەیانی ئەمڕۆ تەقە لە بارەگای ناوچەی یەك-ی پارتی دیموكراتی كوردستان لە سلێمانی كراوە و تەقەكان لە ئۆتۆمبێلێكی جۆری تۆیۆتا لاندگرۆزەرەوە كراون و نزیكەی 20 فیشەك بە بارەگاكەوە نراوە”.

بە وتەی سەرچاوەكان، “تەنھا زیانی ماددی بەر بارەگاكە كەوتووە، ھیچ زیانێكی گیانی نەبووە”.

لای خۆشیەوە، سەركەوت ئەحمەد، وتەبێژی پۆلیسی سلێمانی بۆ (خەڵك) وتی، “پەیوەندیمان بە هەموو تیمەكانی ئاسایش و پۆلیسەوە كردووە و هەموویان جەختیان لەوەكردۆتەوە، كە هیچ حاڵەتێكی لەو جۆرە و تەقەكردن رووینەداوە”.