سەردێر

پاسپۆرتی عیراق دەگۆڕێت

خەڵك-

بڕیارە لەماوەی ئەمساڵدا گۆڕانكاری لەپاسپۆرتی عیراقیدا بكرێت و بەڕێوەبەری پاسپۆرتی سلێمانیش جەختدەكاتەوە، پاسپۆرتە نوێیەكە كوالێتی لەم پاسپۆرتەی ئێستا باشترە و بەپێی بڕیاری وەزیری ناوخۆی عیراق لەماوەی ئەمساڵدا پاسپۆرتە نوێیەكە بەرهەمدێت.

عەمیدی مافپەروەر سالار عەبدوڵا، بەڕێوەبەری پاسپۆرتی سلێمانی بە(خەڵك)ی ڕاگەیاند، ماوەی دوو ساڵە حكومەتی عیراق لەهەوڵی ئەنجامدانی گرێبەستێكدایە، بۆئەوەی پاسپۆرتێكی نوێ بەرهەمبهێنێت، كە لەم پاسپۆرتەی ئێستا جیاوازە، بەجۆرێك ئەم پاسپۆرتە نوێیە، پەڕەكانی پێكهاتوون لە ٤٨ پەڕە، هەر دوو پەڕەیەك تایبەتكراوە بە پارێزگایەكی عیراق، واتە وێنەیەی ئەو پارێزگایەی لەسەرە، بۆنمونە شاری سلێمانی وێنەی قەڵای شێروانە و وێنەی زانكۆی سلێمانی لەسەرە.

زیاتر ڕوونیكردەوە، پەڕەی یەكەمی پاسپۆرتەكە جیاوازترە لەمەی ئێستا، بۆنمونە چیپێكی تێدایە، هەروەها پەڕەكە كاربۆنییە وەك ئەمەی ئێستا نانوشتێتەوە، واتە وەك ئەوەی ئەوروپییەكان وایە.

ئەوەشی خستەڕوو، ئەم پاسپۆرتەی ئێستا بەئاسانی ساختەكاری تێدا دەكرێت و گۆڕانكاری لەناوەڕۆكەكەیدا دەكرێت و پاسپۆرتەكەش بە بەفر و باران و تەڕبوون تێكدەچێت، بەڵام پاسپۆرتە نوێیە بەئاسانی ساختەكاری تێداناكرێت و بەئاسانیش تێكناچێت.

عەمیدی مافپەروەر سالار عەبدوڵا باسی لەئەوەشكرد، چوونە پێشەوەی پێگەی پاسپۆرتی عیراق هاوشێوەی وڵاتان بەتەنها بەگۆڕینی شێوەكەی نابێت، بەڵكو كۆمەڵێك پێوەری جیهانی هەن، دەبێت لەو وڵاتەدا بوونی هەبێت.

لەبارەی پێوەرەكانەوە زیاتر ڕوونیكردەوە، یەكەم پێویستە ئەو وڵاتە ئاسایش و ئارامی تێدا بەرقەراربێت و دووربێت لەكێشە و ئاژەوە، دووەم لەڕووی ئابوورییەوە وڵاتێكی بەهێزبێت و دووربێت لەگەندەڵی، سێیەم بارودۆخی كۆمەڵایەتی ئەو وڵاتە گونجاوبێت.

بەڕێوەبەری پاسپۆرتی سلێمانی لەبارەی كاتی بەرهەمهێنانی پاسپۆرتە نوێیەكە ئاماژەی بەئەوەدا، پێشتر چەند هەوڵێك هەبوو بۆئەوەی لەماوەیەكی نزیكدا ئەم پاسپۆرتە نوێیە دروست بكەن، بەڵام هەوڵەكان نەگەیشتنە ئەنجام، دوای ئەم هەوڵانە وەزیری ناوخۆی ئێستا بڕیاریداوە بەپەلە لەماوەی ئەمساڵدا پێش هەڵبژاردنەكان پاسپۆرتەكە بەرهەمبێت.

ئەوەشی باسكرد، كاتێك ئەم پاسپۆرتە بەرهەمهات، پاسپۆرتە كۆنەكان ناكشێننەوە، بەڵكو كاتێك پاسپۆرتێك بەسەر دەچێت و خاوەنەكەی نوێی دەكاتەوە، پاسپۆرتی نوێی پێدەدەن، یان كاتێك كەسێك بۆیەكەمجار پاسپۆرت دەردەكات، پاسپۆرتی نوێی پێدەدەن.

لەسەرەتای كردنەوەی بەڕێوەبەرایەتی پاسپۆرتی سلێمانی تاكو ئێستا زیاتر لەملیۆنێك و ٥٠٠ هەزار هاووڵاتی سنووری پارێزگای سلێمانی خاوەنی پاسپۆرتن.

پاسپۆرت، بریتییە لە پەڕاوێكی فەرمی بۆ گەشتكردنی ھاووڵاتیان، كە بۆ دەرەوەی سنووری وڵاتەكەیان بەكاریدێنن، لەو وڵاتەی گەشتی بۆ دەكەن لە بری ناسنامە یاخود ڕەگەزنامەی وڵاتەكەیان بەكاریدێنن.

سلێمانی – نزار جەزا