سەردێر

داعش دەیان كوردی شەهید كردووە

خەڵك-بەشی هەواڵ

جێگری بەرپرسی مەڵەندی حەمرینی یەكێتی نیشتمانی كوردستان، رایگەیاند كورد لە ناوچە كێشە لەسەرەكان بەردەوام زیانی مادیی و گیانی دەبەخشێت.
هەرچەندە سەرۆك وەزیرانی پێشووتری عێراق حەیدەر عەبادی ئاشكرایكرد، داعش لە عێراق كۆتایی هاتووە، بەڵام تاكو ئێستاش ناوەوە هێرش دەكەنە سەر هێزەكانی پێشمەرگە و سوپای عێراق و هەندێك جاریش هاووڵاتیانی سڤیل دەبنە قوربان و مەترسییەكی گەورەیان بۆ عێراق و بەتایبەت ناوچە كێشە لەسەركان دروست كردووە.

مەحمود محەمەد جێگری بەرپرسی مەڵەندی حەمرینی یەكێتی نیشتمانی كوردستان بە (خەڵك)ی ڕاگەیاند، ساڵی ڕابردوو دوو هاووڵاتی سڤیلی ناوچەكە بەدەستی چەكدارەكانی داعش شەهید بوون بەناوەكانی “ئیسكەندەر عەلی، كرمانج شێركۆ” و كەسێكیش بەناوی كاوە حوسێن بریندار بووە.
وتیشی”هەر یەك لە قانع جەلال و هێمن جەلال كە دوو برا بوون لە ناوچەكە لەلایەن چەكدارانی داعش بە ئۆتۆمبێلەكەیانەوە ڕفێنران و پاش ماوەیەكی زۆر توانرا بە بڕێك پارە كە بڕەكەی حەوت دەفتەر دۆلار بوو ئازاد كران، بەڵام ئۆتۆمبێلەكەشیان لەدەستدا”.
ئاماژەی بۆ ئەوەش كرد لەسەرەتای ئەمساڵەوە تاكو ئێستا ناوچەكەمان دوو شەهیدی دیكەی بەخشیوە بەناوەكانی “ڕزگار یاسین، ساڵح ئازاد” كە لەلایەن چەكدارانی داعشەوە هێرش بۆسەر ناوچەكەمان كراوە.

سەبارەت بەزیانە مادییەكان، ناوبراو ئاشكرایكرد، زیانە مادییەكانمان زۆرن، بەڵام لە هەموو خراپتر ئەوەیە كە لە ناوچەی داودە مەڕ و ماڵات ناتوانرێت ببرێن بۆ لەوەڕگا، چونكە چەكدارانی داعش ناوچەیەكی زۆریان كۆنتڕۆڵ كردووە و كەس ناوێرێت بچێت بۆ ئەو ناوچەیە، چونكە هەموویان لوغمڕێژ كردووە، ئەمەش كاریگەری لەسەر داهاتی ئەو كەسانەی سەرقاڵی بەخێوكردنی ئاژەڵن دروست كردووە.