سەردێر

كۆشكی سپی مەترسی لەسەرە

 

بەرپرسانی وەزارەتی بەرگری ئەمەریكا ئاشكرایدەكەن، هەزاران سەربازی گاردی نیشتیمانی ئەمەریكا كە بەمەبەستی پاراستنی ڕێوڕەسمی سوێندخواردنەكەی سەرۆك جۆ بایدن بە واشنتندا بڵاوكرانەوە، بەهۆی هەڕەشەكانەوە تاكو مانگی ئادار لە شوێنی خۆیان دەمێننەوە.

ئاژانسی فرانس پرێس بڵاویكردەوە، بەرپرسانی وەزارەتی بەرگری ئەمەریكا زانیاری دیاریكراویان سەبارەت بە هەڕەشەكان بۆسەر كۆشكی سپی ئاشكرا نەكردووە، بەڵام ئاماژەیان بۆ ئەوە كردووە زانیارییەكان لە ئۆفیسی دەزگای لێكۆڵینەوەی فیدڕاڵی ئێف بی ئایەوە وەرگیراون.

دوای ئەوەی لە 6ی ئەم مانگە لایەنگرانی سەرۆكی پێشووی ئەمەریكا هەڵیانكوتایەسەر كۆنگرێسی ئەمەریكا، واشنتن هێشتا نیگەرانە لەسەر ئەگەری ڕوودانی كردەوەی توندوتیژی زیاتر، لای خۆشییەوە جۆن ویتلی هەڵسوڕێنەری كاروباری وەزیری بەرگری ئەمەریكا ڕایگەیاند، خۆی و بەرپرسانی دیكە لە مەترسییەكانی كۆمەڵێك بۆنە لە هەفتەكانی داهاتوودا لە واشنتن ئاگاداركراونەتەوە.

وتیشی”بەرپرسانی ناوخۆ نیگەرانن لە ئەگەری خۆپیشاندان كە لەوانەیە هەندێك لایەن بۆ كاری تێكدەرانە یاخود كێشەی دیكە بەكاریبهێنن، بەڵام هێزە سەربازییەكانمان لەوپەڕی ئامادەباشیدا دەهێڵینەوە تاكو بتوانن وەڵامی ئەم هەڕەشانە بدەنەوە”.

خەڵك-بەشی هەواڵ