سەردێر

“داعش لە سنوری كەركوك چالاكە”

خەڵك-بەشی هەواڵ

بەرپرسی مەڵبەندی كەركوكی بزووتنەوەی ئیسلامی ڕایدەگەیەنێت، بۆشاییەكی ئەمنی زۆر لە ناوچەكە بوونی هەیە و چەكدارەكانی داعش ڕۆژانە چالاكی تێدا ئەنجام دەدەن.

حەسەن شێخانی بەرپرسی مەڵبەندی كەركوكی بزووتنەوەی ئیسلامی بە (خەڵك)ی ڕاگەیاند، ئەوانەی دەیانەوێ گیرەشێوێنی لە ناوچەكە دروست بكەن خەریكی ئەنجامدانی چالاكییەكانیانن.
وتیشی”لێرە سەقامگیری و هەماهەنگییەكی سەربازی نییە، هەست دەكرێت كۆمەڵێك هێز لێرەن و سەركردایەتیییەكی هاوبەشیان نییە وەكو ژوورێكی هاوبەش ئۆپەراسیۆنەكان بەڕێوەببەن”.
ئاشكراشیكرد، هەست دەكرێت بۆشاییەكی زۆری ئەمنی لەم ناوچانە هەبێت، بۆ ئەو مەبەستەش چەندین جار لە كۆبوونەوەی نێوان حزبە كوردستانییەكان داوامان كردووە، ئەو ڕێككەوتنانەی نێوان هەرێم و بەغدا جێبەجێ بكرێن، بۆ ئەوەی ئەو ناوەندانەی دەستنیشان كراون لە ڕەبیعەوە تاكو خانەقین نزیكەی شەش ناوەندن بۆ ئەوەی ژووری هاوبەش دروستبكرێت، ئەو بۆشاییانەی لەنێو سوپای عێراقدا هەن بە هێزەكانی پێشمەرگە پڕ بكرێنەوە.
ڕوونیشیكردەوە، پاشماوەكانی داعش لەم ناوچانە بوونیان هەیە، هێزە عێراقییەكان تەنها ناو شار و جادەكانیان بەدەستەوەیە، گوندێكی زۆر هەیە كە ڕووماڵی ئەمنی نەكراون و گومان دەكرێت خەڵكێكی زۆری تێدا بێت، چونكە ڕۆژ نییە ئەوان چالاكی ئەنجام نەدەن و هاووڵاتیان نەكەنە قوربانی.