سەردێر

بۆ تێپەڕاندنی پڕۆسەی خوێندن داوایەك ئاڕاستەی حكومەتی هەرێم دەكرێت

هاوتای تایبەتمەندییەكانی وەزارەتەكانی پێشمەرگە و تەندروستی، تایبەتمەندییەكیش بە پەروەردە و خوێندنی باڵا بدرێت

 

خەڵك-بەشی هەواڵ

سكرتێری ڕێكخراوی قۆتابیانی كوردستان ڕایدەگەیەنێت، داوا دەكەین حكومەتی هەرێم وەك وەزارەتی پیشمەرگە تایبەتمەندی بە وەزارەتەكانی پەروەردە و خوێندنی باڵا بدات.

وەزارەتی پەروەردەی حكومەتی هەرێمی كوردستان دەستپێكردنەوەی پڕۆسەی خوێندنی بۆ قۆناغی 12ی ئامادەیی لە هەرێم ڕاگەیاند، بەڵام تاكو ئێستا ئەو بڕیارە نەچووەتە قۆناغی جێبەجێكردنەوە، چونكە مامۆستایانی ناڕازی پێیان وایە تاكو 30 ڕۆژ جارێك مووچە دابەش نەكرێت ئەوان ناچنەوە هۆڵەكانی خوێندن، ئەمەش لەكاتێكدایە دەستپێكردنەوەی پڕۆسەی خوێندن بۆ قۆناغەكانی دیكە بۆ سەرەتای مانگی ئادار دواخراوە.

بێستون حەمە ساڵح سكرتێری ڕێكخراوی قوتابیانی كوردستان بە (خەڵك)ی ڕاگەیاند، لەپێناو نەفەوتانی ساڵێكی خوێندنی قوتابیاندا، داوا لە حكومەتی هەرێم و وەزارەتەكانی پەروەردە و خوێندنی باڵا و توێژینەوەی زانستی دەكەم وەك ئەوەی لەكاتی شەڕی داعشدا تایبەتمەندی كرا بۆ هێزەكانی پێشمەرگە و لەكاتی بڵاوبوونەوەی ڤایرۆسی كۆرۆنادا دەرماڵەی هاندانیان بە كارمەندانی تەندروستیدا هەوڵێكی لەو شێوەیەش بۆ وەزارەتی پەروەردە و خوێندنی باڵا بدرێت.
وتیشی”لە ئێستادا بۆ ئەوەی پڕۆسەی خوێندن بەردەوام بێت و ساڵێكی قوتابیان نەفەوتێت تایبەتمەندی بۆ مامۆستایان بكەن و هەر ٣٠ ڕۆژ جارێك مووچە و شایستە داراییەكانیان پێبدەن بۆ ئەوەی بتوانن وانە بە قوتابیان بڵێنەوە”.